Tsementti sertıfıkattaý elimizdegi óndiristiń rekordtyq ósimine serpin berdi

ASTANA. KAZINFORM — 2025 jyldyń 11 aıynyń qorytyndysy boıynsha Qazaqstandaǵy tsement óndirisiniń kólemi 13,07 mln tonnaǵa jetip, salanyń búkil damý tarıhyndaǵy eń joǵary kórsetkish tirkeldi. Bul nátıjege qol jetkizýdiń negizgi alǵysharttarynyń biri tsement ónimderin sertıfıkattaýdyń ulttyq júıesin jetildirý boldy. Atalǵan jumys jańartylǵan ST RK 3361-2022 ulttyq standarty aıasynda júzege asyryldy.

Qazaqstan Respýblıkasy Saýda jáne ıntegratsııa mınıstrligi 2025 jyly tsement pen portlandtsement klınkerin óndirýdiń tehnologııalyq reglamentine qoıylatyn talaptardy aıqyndaıtyn ulttyq standartty bekitti. Qujat tsement ónimderiniń sáıkestigin rastaý rásimderi barysynda baǵalanatyn tehnologııalyq protsesterdi sıpattaý men qoldanýǵa biryńǵaı tásilderdi qalyptastyrýǵa baǵyttalǵan.

Ulttyq standart ST RK 3361-2022 «Sáıkestikti baǵalaý. Tsement pen portlandtsement klınkeriniń sáıkestigin rastaý tártibi» talaptaryn eskere otyryp ázirlendi jáne GOST R 58100-2018 «Sáıkestikti baǵalaý. Tsementterdi sertıfıkattaý qaǵıdalary. Tsement óndirýdiń tehnologııalyq reglamentine qoıylatyn talaptar» memlekettik standartymen úılestirildi. Ulttyq standartty ázirleýge ótinim berýshi — «QazCem» Qazaqstandyq tsement jáne beton óndirýshiler qaýymdastyǵy» zańdy tulǵalar birlestigi.

Tsement ónerkásibi — qurylys salasynyń negizgi bazalyq sektorlarynyń biri jáne eldiń ınfraqurylymdyq damýyna tikeleı yqpal etedi. Óndiriletin tsementtiń sapasy men turaqtylyǵy tehnologııalyq protsesterdiń qatań saqtalýyna baılanysty. Osy turǵydan alǵanda, standarttalǵan tehnologııalyq reglamentti engizý óndiristi júıeleýge, tehnologııalyq protsesterdiń basqarylýyn kúsheıtýge jáne ónim sapasynyń turaqty deńgeıin qamtamasyz etýge múmkindik beredi.

Ulttyq standartty qabyldaý salanyń damýyna kedergi keltirip kelgen birqatar júıeli máselelerdi sheshýge baǵyttalǵan. Atap aıtqanda, tehnologııalyq reglamentterdiń mazmuny men rásimdelýine qoıylatyn normatıvtik talaptardyń bolmaýy, ónim sapasyna, energııa tıimdiligine jáne ekologııalyq qaýipsizdikke qoıylatyn talaptardyń kúsheıýi, sondaı-aq óndiristik táýekelderdi tómendetý qajettiligi osy qujatty ázirleýdiń basty sebepteriniń biri boldy.

Tehnologııalyq reglament tsement pen portlandtsement klınkeriniń sáıkestigin rastaý rásimderinen ótý kezinde mindetti qujat bolyp tabylady. ST RK 3361-2022 standartynyń 6.3-tarmaǵyna sáıkes, ol ótinish berýshi tarapynan sáıkestikti rastaý organyna usynylatyn qujattar toptamasynyń quramyna kiredi.

Ulttyq standartty engizýdiń ekonomıkalyq tıimdiligi portlandtsement pen taýarlyq klınker óndirýge qoıylatyn biryńǵaı talaptardy belgileý arqyly qamtamasyz etiledi. Bul óndiristik protsesterdiń turaqtylyǵyn arttyryp, ónim sapasynyń birkelkiligin saqtaýǵa jáne otandyq tsement ónimderiniń básekege qabilettiligin kúsheıtýge múmkindik beredi.

Sáıkestikti baǵalaý júıesin damytý tájirıbesi óziniń tıimdiligin is júzinde dáleldedi. 2019 jyly ST RK 3361-2022 ulttyq standarty engizilgennen keıin Qazaqstanda jasyryn ımport kólemi aıtarlyqtaı qysqaryp, tsement óndirisiniń kórsetkishteri rekordtyq deńgeıge jetti. Al standarttyń jańartylǵan nusqasy salanyń odan ári damýyna serpin berip, 2025 jyly óndiris kóleminiń tarıhı maksımýmyna qol jetkizýge múmkindik jasady.

Jańa ulttyq standartty engizý tsement ónimderiniń sapasyn baqylaý júıesin kúsheıtip, saladaǵy ádil básekelestikti qamtamasyz etýge jáne otandyq óndiristiń turaqty ósýine qosymsha jaǵdaılar qalyptastyrady. Sonymen qatar, tsement ónerkásibi bul standartty engizýge is júzinde tolyq daıyn jáne óndirýshiler úshin qandaı da táýekel nemese qıyndyq týdyrmaıdy.

Eske sala keteıik, buǵan deıin Úkimet sý únemdeý tehnologııalaryn engizý sharalaryn pysyqtaıtynyn habarladyq.