Tsehinde 1 keliden astam esirtki saqtaǵan kásipker 15 jylǵa sottalýy múmkin

ASTANA. KAZINFORM – Polıtsııa jıhaz tsehinde esirtki saqtaǵan qostanaılyqty ustady, dep habarlaıdy Polisia.kz.

Qostanaı oblysy PD esirtki qylmysyna qarsy is-qımyl bóliminiń qyzmetkerleri jedel izdestirý is-sharalary barysynda qyzmettik ıtti paıdalana otyryp, jıhaz tsehinde jasyl tústi zattardy saqtaǵan 38 jastaǵy er adamdy anyqtap, ustady.

— Munda ol jeke kásipker bola otyryp, tapsyrys boıynsha jıhaz jasaýmen aınalysqan. Saraptama kórsetkendeı, tárkilengen zattar 600 gramm gashısh jáne 500 gramm marıhýana bolyp shyqty. Aıta ketý kerek, bul óte iri kólemge jatady. Bul fakt boıynsha polıtsııa sotqa deıingi tergeý júrgizip jatyr, — delingen habarlamada.

Esirtkiniń asa iri partııasyn ótkizý maqsatynda zańsyz saqtaǵany úshin kúdiktiniń múlki tárkilenip, ol 10 jyldan 15 jylǵa deıin bas bostandyǵynan aıyrylýy múmkin.

Eske salsaq, osyǵan deıin Prezıdent esirtki óndirýge qatysty qylmystyq jaýapkershilikti qataıtatyn zańǵa qol qoıǵanyn habarladyq.