TSARKA «Aeroflot» jelisine baǵyttalǵan kıbershabýylǵa qatysty málimdeme jasady

ASTANA. KAZINFORM — 28 shildede Silent Crow jáne «Kıberpartızany BY» toptary reseılik «Aeroflottyń» korporatıvtik jelisine keń aýqymdy shabýyl jasady. Bul týraly Kıbershabýyldardy taldaý jáne tergeý ortalyǵy (TSARKA) málim etti. 

— Hakerlerdiń málimetine qaraǵanda, tańerteń Sheremetevo, Melkısarovo keńselerindegi jáne kompanııanyń derekter ortalyqtaryndaǵy 7 myńnan astam server men jumys stantsııalary joıylǵan. Іshki júıeler men derekqorlar óshirildi. Qazirgi ýaqytta Aeroflot jumysyn qalpyna keltirgenin jáne Máskeýden jáne keri baǵyttaǵy reısterdiń 93%-yn oryndaýdy josparlap otyrǵanyn habarlady, — delingen atalǵan ortalyq aqparatynda.

Kompanııa júıesin buzýdyń negizgi faktileri:

— Jelide Windows XP jáne Windows Server 2003 paıdalanylyp kelgen;
— Qyzmetkerlerdiń, sonyń ishinde top-menedjmenttiń qupııa sózderi jyldar boıy ózgertilmegen. Hakerlerdiń habarlaýynsha, Aeroflottyń bas dırektory dál osyndaı qupııa sózdi 2022 jyldan beri paıdalanyp kelgen;
— Hakerler bir jyldan astam ýaqyt boıy ınfraqurylymǵa qosylǵan jáne derekterdiń úlken kólemin kóshirgen. Onyń arasynda hat almasý, telefon baılanysy, áýe saparlarynyń tarıhy, muraǵat materıaldary bar.

TSARKA málimetinshe, Qazaqstanda avıatsııalyq segmenttegi kıberqaýipsizdik máseleleri de júıeli túrde kóterilip keledi. 2021 jyly zertteýshi ishki qyzmetterge qol jetkizýdi qamtamasyz etetin bagbaýntı- platformasy arqyly elordadaǵy áýejaıdyń poshta júıesindegi osal tustaryn anyqtady.

Sonymen qatar mamandar 2025 jyly Windows XP júıesi kıbershabýyldar úshin ońaı olja ekenin aıtyp otyr. Microsoft 2014 jyly XP-ge qoldaý kórsetýdi toqtatty jáne bul júıedegi kez kelgen osal jerin qorǵaý qıynǵa túsedi. Qazaqstanda XP áli kúnge deıin jumys stantsııalarynda, tipti óndiristik nysandardyń serverlerinde kezdesedi. Bul ulttyq qaýipsizdikke qaýip tóndiredi.

— Tártip, baqylaý jáne qorǵanysty jaqsartý boıynsha turaqty jumys bolmasa, eshbir tehnologııa sizdi qutqarmaıdy. Naqty áreketterge toqtalsaq, únemi jańartý jasap otyrý kerek, sondaı-aq qyzmetkerlerdi oqytý jáne qalpyna keltirý josparlaryn teksergen mańyzdy. Aeroflot oqıǵasy álemde qorǵalǵan júıeler joq ekenin anyq kórsetti, — dep atalyp ótken TSARKA aqparatynda.

Aıta keteıik, jarty jylda elimizde ınfraqurylymǵa jasalǵan 965 mln-nan astam kıbershabýylǵa toıtarys berildi. 

Buǵan deıin Kólik mınıstrligi «Aeroflot» áýe kompanııasyna qatysty jaǵdaıdy túsindirdi.