TsAHAL: Izraıl Irannyń ıadrolyq jobasyna qatysty ınfraqurylymǵa soqqylardy aıaqtady

ASTANA. KAZINFORM — Izraıl armııasy (TsAHAL) Irannyń ıadrolyq qarý jobasyna qatysy bar ınfraqurylymǵa áýe soqqylarynyń iri serııasyn aıaqtaǵanyn málimdedi, dep habarlaıdy BBC.

TsAHAL ókilderiniń habarlaýynsha, áýe shabýyly kezinde Tegerandaǵy Iran Qorǵanys mınıstrliginiń shtaby, SPND ıadrolyq jobasynyń shtaby jáne Iran rejıminiń ıadrolyq qarýǵa umtylýyna yqpal etken basqa da nysandar nysanaǵa alynǵan.

Irannyń Tasnim agenttigi buǵan deıin Izraıl soqqysynan Qorǵanys mınıstrliginiń ákimshilik ǵımaraty jeńil zaqymdanǵanyn, sondaı-aq Iran Qorǵanys mınıstrligine qarasty Qorǵanys zertteýleri men ınnovatsııalar uıymy (SPND) zardap shekkenin habarlaǵan edi.

15 maýsymǵa qaraǵan túni Iran Izraılge ballıstıkalyq zymyrandar men drondardy qoldana otyryp jappaı shabýyl bastaǵan bolatyn. Fars agenttiginiń habarlaýynsha, shabýyl Izraıldiń strategııalyq energetıkalyq ınfraqurylymyn nysanaǵa alǵan.

Eske salaıyq, 13 maýsymǵa qaraǵan túni Izraıl Iran aýmaǵyna jappaı soqqy jasaǵan. Oǵan jaýap retinde Tegeran júzden astam drondy Izraıl baǵytyna ushyrǵan. Iran Natanzdaǵy ıadrolyq nysannyń zaqymdanǵanyn rastady, alaıda radıatsııanyń taralýyn joqqa shyǵardy.

BUU-daǵy Iran ókili Izraıldiń áýe soqqylary saldarynan 78 adamnyń qaza tapqanyn, taǵy 320-dan astam adamnyń jaraqat alǵanyn málimdedi. Qaza bolǵandar qatarynda Irannyń joǵary áskerı basshylyǵy men jetekshi ǵalymdar bar.

Sondaı-aq Izraıldiń shabýyldarynan keıin Iran Ormýz buǵazyn jabý múmkindigin qarastyryp jatqanyn Iran parlamentiniń ulttyq qaýipsizdik jáne syrtqy saıasat jónindegi komıtet múshesi Esmaıl Kosarı habarlady.

Iran men AQSh arasyndaǵy kelissózderge araaǵaıyndyq jasap júrgen Oman Syrtqy ister mınıstri Badr ál-Býsaıdı Maskatta jeksenbi kúni ótýi tıis kezdesýdiń endi ótpeıtinin rastady.

Iran Prezıdenti Emmanýel Makronmen sóılesý kezinde Izraıl shabýyldaryn toqtatpaıynsha AQSh-pen eshqandaı kelissóz júrgizilmeıtinin málimdedi.