TsAHAL: Irannyń zymyran shabýylynan 21 adam zardap shekti
ASTANA. KAZINFORM — TsAHAL-dyń (Izraıl Qarýly kúshteri) baǵalaýynsha, Iran eki tolqyndy shabýyl barysynda Izraılge 100-ge jýyq zymyran atqan, dep habarlaıdy VVS.
Medıtsınalyq qyzmetterdiń málimetinshe, snarıadtar toǵyz jerde jarylyp, 21 adam jaraqat alǵan.
— Birqatar ǵımarat zaqymdandy, olardyń keıbirine áýe shabýylyna qarsy júıeniń áreketinen qalǵan jaryqshaqtar tıgen, — dep jazdy X jelisinde TsAHAL-dyń arab tilindegi baspasóz hatshysy Avıhaı Adraı.
The Times of Israel taratqan aqparatqa sáıkes, turǵyndarǵa bomba panalarynan shyǵýǵa ruqsat berildi, biraq olarǵa solardyń mańynda bolýǵa keńes berildi.
«Magen Davıd Adom» medıtsınalyq qyzmeti habarlaǵandaı, shabýyl saldarynan 21 adam zardap shekken. Zymyrandardyń biri Tel-Avıvtegi bıik munaraly ǵımaratqa túsip, zaqym keltirgen. Irannyń Islam revolıýtsııasy saqshylar korpýsy (KSIR) shabýyldyń nysanasy áskerı ortalyqtar men áýe bazalary bolǵanyn málimdedi.
Izraıldiń qorǵanys mınıstri Israel Kats: «Iran beıbit turǵyndarǵa arnalǵan aýmaqtardy zymyranmen atqylaýǵa batyly jetkende, barlyq «qyzyl syzyqtan» ótkenin aıtty». Axios agenttigine silteme jasaǵan Izraıl sheneýniginiń aıtýynsha, Irannyń ballıstıkalyq zymyrandaryn toıtarýǵa AQSh kómektesken.
Iran shabýyl jasamaı turyp, birneshe mınýt buryn Frantsııa prezıdenti Emmanıýel Makron málimdeme jasaǵan edi.
— Eger Irannyń jaýap áreketi aıasynda Izraıl shabýylǵa ushyrasa, Frantsııa óziniń yqpalyn eskere otyryp, ony qorǵaý men qorǵanys operatsııalaryna qatysýǵa daıyn — eger mundaı múmkindik bolsa, — dep málimdedi Makron.
Sonymen qatar ol Frantsııanyń TsAHAL-dyń qandaı da bir shabýyl operatsııalaryna qatysý múmkindigin úzildi-kesildi joqqa shyǵardy.
Eske salaıyq, jumaǵa qaraǵan túni Izraıl Iran aýmaǵyna jappaı soqqy jasady. Bul shabýyldyń saldarynan Islam revolıýtsııasy saqshylar korpýsynyń (KSIR) birqatar joǵary laýazymdy komandırleri men ıadrolyq fızıka salasyndaǵy ǵalymdar qaza tapty. Iran sondaı-aq Natanz qalasyndaǵy ıadrolyq nysannyń zaqymdanǵanyn rastady, biraq radıatsııanyń taralý faktisin joqqa shyǵardy.
AQSh Memlekettik hatshysy Izraıldiń Iranǵa qarsy jasaǵan soqqylaryn «birjaqty áreket» dep atap, oǵan Aq úıdiń qatysy joq ekenin málimdedi.
Izraıldiń Iranǵa jasaǵan soqqysynan keıin munaı baǵasy kúrt kóterildi.
Buǵan deıin Iran Izraılge zymyran atyp, elde áýe dabyly jarııalanǵanyn jazǵanbyz.