TsAHAL Gazadaǵy eń joǵary laýazymdy «Islam memleketi» jetekshisin joıdy

ASTANA. KAZINFORM — Sońǵy apta ishinde Izraıl Qorǵanys armııasy (TsAHAL) Gaza sektorynda «Islam memleketi» (IM) tobynyń joǵary laýazymdy múshesin joıdy. Bul týraly TsAHAL juma kúni jarııalaǵan málimdemede aıtyldy, dep habarlaıdy Sınhýa.

Izraıl qarýly kúshteri bul adamdy Mýhammad Abd ál-Azız Abý Zýbaıda dep tanyp, onyń Gaza sektoryndaǵy IM-niń Palestına aımaǵy boıynsha basshysy bolǵanyn málimdedi. Bul laýazym — palestınalyq anklavtaǵy Islam memleketi qurylymyndaǵy eń joǵary deńgeı bolyp sanalady.

TsAHAL-dyń málimdeýinshe, Abý Zýbaıda ızraıldik barlaý qyzmetiniń nusqaýymen jasalǵan áýe soqqysynyń nysanasy bolǵan. Ol IM tarapynan saıasatty ázirleý, operatsııalardy josparlaý jáne Gaza, Iordan ózeniniń Batys jaǵalaýy men Mysyrdyń Sınaı túbegindegi top áreketterine baqylaý jasaýǵa jaýapty bolǵan kórinedi.

TsAHAL IM sodyrlarynyń Gazada Izraıl áskerimen tikeleı soǵysqa qatysqanyn, sondaı-aq Batys jaǵalaýdan Gaza sektoryna qarý-jaraq pen iri kólemde qarjy aýdarǵanyn málimdedi.

— TsAHAL Gaza sektoryndaǵy lańkestik uıymdarǵa qarsy áreketin jalǵastyra beredi, — delingen resmı málimdemede.

Budan buryn habarlanǵandaı, Izraıldiń Gaza sektoryna jasaǵan shabýylynan qaza tapqandar sany 62 895 adamǵa jetti.