TsAHAL Gaza sektorynyń ońtústiginde gýmanıtarlyq aımaq qurylǵanyn habarlady
ASTANA. KAZINFORM – Gaza qalasyndaǵy qurlyq operatsııasynyń keńeıýi jáne «II Gıdeon arbalary» operatsııasy aıasynda palestınalyq HAMAS bekinisteriniń basyp alý maqsatynda Izraıl qorǵanys kúshteri Gaza sektorynyń ońtústigindegi Han ıÝnıs qalasynda gýmanıtarlyq aımaq qurǵanyn málimdedi.
TsAHAL bul týraly senbi, 6 qyrkúıekte Telegram jelisinde habarlady.
Bul aımaqta dalalyq aýrýhanalar, sý qubyrlary men tuşylandyrý qondyrǵylary bar, deıdi Izraıl áskerıleri. Oǵan azyq-túlik, shatyrlar, dári-dármek jáne medıtsınalyq qural-jabdyqtar jetkiziledi, olar COGAT (Óńirlerdegi úkimet qyzmetin úılestirýshi, Palestına aýmaqtarynda jumys isteýge jaýapty Izraıl Qorǵanys mınıstrliginiń bólimshesi. – Red.) jáne halyqaralyq qaýymdastyqpen kelise otyryp jetkiziledi.
Osylaısha, «Gaza qalasynyń turǵyndaryna jáne ondaǵylardyń barlyǵyna» osy aımaqqa kóshýge keńes beriledi, dep túsindirdi AFP. «Múmkindikti paıdalanyp, dereý gýmanıtarlyq aımaqqa baryńyz jáne buǵan deıin barǵan myńdaǵan adamnyń qataryna qosylyńyz», - dep keltiredi agenttik ızraıldik áskerılerdiń sózin.
Birikken Ulttar Uıymynyń málimeti boıynsha, Gaza sektory men onyń mańyndaǵy aýdandarda 1 mıllıonǵa jýyq adam turady.
Tamyz aıynda HAMAS Egıpet, AQSh jáne Qatar deldaldary usynysy boıynsha atysty ýaqytsha toqtatýǵa kelisti. Degenmen, ásirese Izraıl ıslamshylardan kepilge alynǵandardyń barlyǵyn bosatyp, qarýlaryn tastap, Gaza sektoryndaǵy qaýipsizdikti baqylaýdy Izraılge berýin talap etedi.
BUU: Gazada resmı túrde tolyq kólemde asharshylyq tirkeldi
Tamyz aıynda FRC (Famine Review Committee — ashtyqty baǵalaý komıteti) sarapshylar toby Gaza provıntsııasynyń soltústiginde asharshylyq tirkelgenin alǵash ret resmı túrde rastady. Azyq-túlik qaýipsizdiginiń biriktirilgen klassıfıkatsııasy (IPC) asharshylyq 5-deńgeıde nemese apatty jaǵdaıda boldy dep habarlady. FRC esebi 22 tamyzda jarııalandy.
Eske salaıyq, Taıaý Shyǵystaǵy jaǵdaı 2023 jyldyń 7 qazanynda kúrt ýshyǵyp ketti. HAMAS qozǵalysy Izraılge jappaı zymyrandyq shabýyl jasap, onyń aýmaǵyna basyp kirip, 1200-ge jýyq adamnyń ómirin qıdy. Sondaı-aq sodyrlar 250-den astam adamdy kepilge alyp, Gaza sektoryna alyp ketken. Kepilge alynǵandardyń bir bóligi aýystyryldy nemese bosatyldy, keıbiri qaıtys boldy.
Izraıl jaýap retinde HAMAS-qa soǵys jarııalady. Qurlyq operatsııasy men Gaza sektoryn bombalaý kezinde 62 myńnan astam palestınalyq qaza taýyp, 157 myńnan astamy jaralandy, dep habarlaıdy HAMAS baqylaýyndaǵy Densaýlyq saqtaý mınıstrligi.
Aıta keteıik, TsAHAL Gazadaǵy eń joǵary laýazymdy «Islam memleketi» jetekshisin joıdy.