TsAHAL-dyń rezervtegi áskerı qyzmetkeri palestınalyq tutqyndardy uryp-soqqany úshin túrmege jabyldy
ASTANA. KAZINFORM – Izraıl áskerı soty palestınalyq tutqyndarǵa qatygezdik kórsetkeni úshin aǵa serjant Israel Hadjıbıdi jeti aıǵa bas bostandyǵynan aıyrý týraly úkim shyǵardy, dep habarlaıdy VVS.
Ol palestınalyq tutqyndarǵa qatysty birneshe ret qorlaý, fızıkalyq zorlyq-zombylyq jáne orynsyz minez-qulyq tanytqany úshin kináli dep tanyldy.
Sot materıaldarynda sarbazdyń tutqyndardy birneshe ret judyryǵymen jáne myltyqpen urǵany aıtylady.
Bul 2024 jyldyń aqpan-maýsym aılary aralyǵynda Gaza shekarasynyń janyndaǵy Sde-Teıman áskerı bazasynda boldy. Ol 7 qazanda HAMAS shabýylynan keıin aımaqtaǵy áskerı operatsııa bastalǵan kezde palestınalyqtardy ustaý ortalyǵyna aınaldy.
Hadjıbı ótken jyldyń shilde aıynyń basynda qamaýǵa alynyp, 30 shildede áskerı prokýratýra oǵan qarsy aıyp taqty.
Tergeý kezinde keıbir jaǵdaılarda zorlyq-zombylyqtyń basqa sarbazdardyń qatysýymen bolǵany, olardyń keıbireýleri Hadjıbıdi toqtatýǵa shaqyrǵany anyqtaldy.
TsAHAL málimdemesinde onyń tutqyndardy qoldary kisendelgen jáne kózderi baılanǵan kezde urǵany aıtylǵan.
Hadjıbı onyń keıbir áreketterin telefonyna jazyp alǵan. Osy jazbalarǵa súıene otyryp, sot zorlyq-zombylyqqa betperde kıgen birneshe sarbazdyń da qatysy bar degen qorytyndyǵa kelgen bolýy múmkin. Olardyń kim ekeni áli anyqtalǵan joq.
Sot otyrysynda Israel Hadjıbı óz kinásin moıyndady.
Sot aıyptalýshynyń áreketin qatygezdik, al onyń adamdarǵa qarsy qoldanǵan kúshti aýyrlatatyn mán-jaı dep tapty, delingen TsAHAL málimdemesinde.
Aıta keteıik, HAMAS taǵy úsh ızraıldikti bosatty.