Elimizdiń úzdik áleýmettik qyzmetkerleri anyqtalady
ASTANA. KAZINFORM – «Áleýmettik qorǵaý júıesiniń úzdik qyzmetkeri jáne úzdik áleýmettik joba» respýblıkalyq konkýrsyna qatysýǵa ótinimderdi qabyldaý bastaldy. Bul týraly Astana qalalyq jumyspen qamtý jáne áleýmettik qorǵaý basqarmasy basshysynyń orynbasary Aıgúl Talasova aıtty.
- Eńbek jáne halyqty áleýmettik qorǵaý mınıstrliginiń «Áleýmettik qorǵaý júıesiniń úzdik qyzmetkeri jáne úzdik áleýmettik joba» respýblıkalyq konkýrsyna qatysýǵa ótinimderdi qabyldaý bastaldy. Konkýrs halyqty áleýmettik qorǵaý júıesin damytýǵa jáne ómir súrý sapasyn arttyrýǵa eleýli úles qosyp júrgen kórnekti mamandar men ınnovatsııalyq bastamalardy anyqtaý jáne yntalandyrýǵa baǵyttalǵan. Negizgi maqsaty – áleýmettik qyzmetkerler mamandyǵynyń bedelin arttyrý, ozyq tájirıbeni engizýdi yntalandyrý jáne áleýmettik qyzmet kórsetý salasyndaǵy ozyq tájirıbeni taratý, - dedi ol Astana qalalyq kommýnıkatsııalar qyzmetinde ótken brıfıngte.
Onyń dereginshe, konkýrs áleýmettik jumystyń negizgi baǵyttaryn qamtıtyn mynadaı jeti nomınatsııa boıynsha ótkiziledi:
- «Arnaýly áleýmettik qyzmetter kórsetý ortalyǵynyń úzdik áleýmettik qyzmetkeri»;
- «Úıde kútim kórsetý uıymynyń úzdik áleýmettik qyzmetkeri»;
- «Úzdik memlekettik áleýmettik ınspektor»;
- «Úzdik medıtsınalyq-áleýmettik saraptama qyzmetkeri»;
- «Úzdik áleýmettik pedagog» (arnaýly áleýmettik qyzmet kórsetý júıesinde);
- «Eńbek mobıldiligi ortalyǵynyń (mansap ortalyǵy) úzdik qyzmetkeri»;
- «Úzdik áleýmettik joba».
- Konkýrs erejesine sáıkes qatysýshylar konkýrstyq ótinimdi, prezentatsııa materıaldaryn jáne jumystary nemese jobasy týraly qysqasha beınerolıkti daıyndaýy kerek. Ótinimderdi www.qamqor.enbek.kz onlaın platformasy arqyly berýge bolady. Konkýrs eki kezeńde ótedi: oblystyq jáne respýblıkalyq. Arnaıy komıssııa ashyqtyq pen obektıvtilik qaǵıdattaryn saqtaı otyryp, birneshe nomınatsııalar boıynsha jeńimpazdardy anyqtaıdy. Sonymen qatar, elektrondy tsıfrlyq qoltańbany paıdalana otyryp, platformada qoǵamdyq onlaın daýys berý júrgiziledi. Onyń nátıjeleri jeńimpazdardy tańdaý kezinde eskeriledi, - dedi Aıgúl Talasova.
Basqarma basshysynyń aıtýynsha, baıqaý aıasynda «Áleýmettik qyzmetkerdiń bir kúni», «Meıirim shýaǵy», «Áleýmettik ıdeıa» jáne «Áleýmettik qyzmetkerge alǵys» taqyryptarynda #Áleýmettikfleshmob, #SotsıalnyıFleshmob birtutas heshtegimen birqatar áleýmettik chellendjder júrgiziledi. Konkýrs nátıjeleri Áleýmettik qyzmetkerler kúni qarsańynda – 2025 jylǵy 24 qazanda Astana qalasynda ótetin marapattaý rásiminde jarııalanady.
Buǵan deıin 2025 jyldyń basynan bastap Áleýmettik qyzmetter portaly (budan ári – Portal) arqyly múgedektigi bar adamdardyń 427,1 myń tapsyrysy oryndalǵanyn jazǵan edik.