Tis emdetken balanyń ólimi: Sot DSM men prokýratýraǵa úndeý joldady
ASTANA. KAZINFORM — Tis emdetken úsh jasar qyzdyń ólimine baılanysty sot qorytyndysy boıynsha stomatologııalyq klınıka basshysyna jeke úkim shyǵaryldy.
Sot kezinde anyqtalǵan zańsyzdyqtar Densaýlyq saqtaý mınıstrligine, Astana qalasynyń polıtsııa departamentine, prokýratýraǵa joldandy.
Atalǵan jeke qaýlyda Densaýlyq saqtaý mınıstrligine balalarǵa anestezııa qoldaný erejelerin qaıta qaraý usynylǵan. Al quqyq qorǵaý organdaryna klınıka qyzmetkerleriniń is-áreketi men áreketsizdigine zańdyq baǵa berý tapsyryldy.
Sot otyrysynda tis emdeıtin klınıka zańda kórsetilgen mindetterin oryndamaǵan.
— Jeke stomatologııalyq klınıka basshylyǵy zań talaptaryn oryndamaǵan. 2023 jyldyń 26 sáýirindegi № 78 buıryqtyń 12.27 tarmaǵy buzylǵan. Óıtkeni anestezıolog dáriger josparly emdik protsedýradan 24-48 saǵat buryn patsıentti kózbe-kóz qaramaı, qashyqtan sóılesý arqyly anestezııaǵa jibergen, — dedi ol.
Úkimde balaǵa medıtsınalyq kómek kórsetýge tartylǵan adamdardyń tıisti biliktiligin rastaıtyn qujattary joq ekeni de aıtylǵan. Al ota bólmesi mindetti reanımatsııalyq jabdyqpen, onyń ishinde defıbrılıatormen jabdyqtalmaǵan. Anestezıologııaǵa arnalǵan jabdyq tehnıkalyq tekseristen ótkizilmegeni anyqtalǵan.
Sýdıanyń aıtýynsha, bul Densaýlyq saqtaý mınıstrliginiń 2022 jylǵy jeltoqsandaǵy buıryǵyna qaıshy.
Jeke qaýlyda arnaıy jedel medıtsınalyq kómek brıgadasy ýaqytynda shaqyrylmaǵany da kórsetilgen.
— Sot qorytyndysy boıynsha, anyqtalǵan zańsyzdyqtar júıeli jáne uıymdastyrýshylyq sıpatqa ıe. Medıtsınalyq uıym basshylyǵy mindetterin durys oryndamaǵan. Atalǵan jaıttar bala densaýlyǵyn qorǵaý salasyndaǵy zań talaptarynyń buzylǵanyn, anestezıologııalyq kómek standarttarynyń saqtalmaǵanyn jáne jeke medıtsınalyq uıymdardyń qyzmetine jetkilikti baqylaý joq ekenin dáleldeıdi, — dedi sýdıa.
Osyndaı jaıttar qaıtalanbaý úshin Densaýlyq saqtaý mınıstrligine is barysynda anyqtalǵan júıelik kemshilikterdi joıatyn normatıvter qabyldaý kerektigi týraly usynys joldanatyn boldy.
— Jeke qaýlyny Astana qalasy polıtsııa departamenti men Astana qalasy prokýroryna joldansyn. Klınıka basshylyǵy men basqa medıtsınalyq qyzmetkerlerdiń is-áreketin, áreketsizdigin jan-jaqty jáne obektıvti tekserip, zańdy baǵasyn berý qajet. Qylmystyq protsessýaldyq kodekstiń 405-babynyń altynshy bólimine sáıkes, jeke qaýly boıynsha qabyldanǵan sharalardyń nátıjesi bir aıdyń ishinde sotqa habarlanýy tıis, — dedi sýdıa.
Buǵan deıin sot úsh jasar qyzdyń ólimine kináli dep aıyptalǵan anestezıologqa qatysty úkim shyǵarǵanyn jazǵan edik.