Trump Organization Maldıv araldarynda tokenızatsııalanǵan lıýks-kýrort salmaq
ASTANA. KAZINFORM — Trump Organization jáne Saýd Arabııasy qoldaıtyn, Londonda tirkelgen elıtalyq qurylys kompanııasy Dar Global Maldıv araldarynda blokcheın-tehnologııasyn qoldanatyn jańa lıýks-kýrort salatynyn málimdedi, dep jazady Kazinform.
Crypto Times habarlaýynsha, 2028 jyldyń sońyna josparlanǵan joba aıasynda kýrortty qarjylandyrý úshin tokenızatsııa mehanızmi qoldanylmaq. Bul ınvestorlarǵa qurylys bastalǵan sátten bastap qatysýǵa jáne blokcheın negizinde shyǵarylatyn tsıfrlyq aktsııalardy (tokenderdi) satyp alýǵa múmkindik beredi.
Bul — qonaqúı salasynda alǵash ret qoldanylyp otyrǵan tokenızatsııalanǵan qarjylandyrý modeli, ıaǵnı menshik úlesteri tolyqtaı tsıfrlyq formatta tirkelip, keıin qaıta satýdy jeńildetedi.
Trump International Hotel Maldives-te jaǵalaýda jáne sý ústinde ornalasqan 80 ýltralıýks vılla salynady. Olarǵa Male qalasynan jyldam júretin katermen 25 mınýtta jetýge bolady.
Maldıvtegi jańa kýrort Trump Organization men Dar Global kompanııalarynyń keńeıip kele jatqan halyqaralyq portfeliniń jalǵasy. Seriktestik aıasynda:
• Dýbaıdaǵy jáne Jıddadaǵy Trump Towers,
• Oman men Katardaǵy kýrorttyq jobalar,
• golf alańdary men elıtalyq turǵyn úıler salynýda.
Jobanyń jarııalanýy Saýd Arabııasynyń murager hanzadasy Muhammed ıbn Salmannyń Vashıngtonǵa 2018 jyldan bergi alǵashqy resmı sapary qarsańynda oryn aldy. Sapar barysynda Er-Rııad pen Vashıngton arasyndaǵy ekonomıkalyq áriptestik máseleleri talqylanýy múmkin.
Maldıvtegi bastama álemdegi jyljymaıtyn múlikti tokenızatsııalaý úrdisiniń kúsheıýimen de baılanysty.
• 2025 jylǵy naýryzda Dýbaıdyń Jer departamenti (DLD) Ctrl Alt platformasymen birlesip blokcheınge negizdelgen baǵdarlama iske qosty. Ol ınvestorlarǵa jyljymaıtyn múliktiń shaǵyn úlesin XRP Ledger ortalyqtandyrylmaǵan jelisinde tirkep satyp alýǵa múmkindik beredi.
• 2025 jylǵy shildede DLD Crypto.com kompanııasymen seriktestik ornatyp, jyljymaıtyn múlik operatsııalarynda krıptovalıýta qoldaný, aktıvterdi tokenızatsııalaý jáne blokcheın-tólemderdi damytý jóninde kelisimge keldi. Bul bastama Dýbaıdyń 2033 jylǵa deıingi jyljymaıtyn múlik strategııasyna kiredi.
Tramp otbasy tsıfrlyq aktıvter salasynda da belsendi. World Liberty Financial (WLFI) kompanııasy BitGo rezervterimen tolyq qamtamasyz etilgen USD1 steıblkoınyn basqarady.
Buǵan deıin FIFA óz krıptovalıýtalyq tokenin — FIFA coin shyǵarýy múmkin ekeni habarlanǵan.