Trotýarlar men joldarǵa jarnama jazyp ketkenderge aıyppul salynady – zań jobasy
ASTANA. KAZINFORM — Trotýarlar men joldardy boıap, jarnama jazyp ketkenderge aıyppul salynady. Tıisti norma búgin Májiliste tanystyrylǵan elordany jáne respýblıkalyq mańyzy bar qalalardy damytý máselelerine arnalǵan zań jobasy aıasynda usynyldy.
Ulttyq ekonomıka vıtse-mınıstri Baýyrjan Omarbekovtiń aıtýynsha, syrtqy jarnamany joldar men kóshelerdi boıaý arqyly ornalastyrý qalalardyń estetıkalyq kelbetine teris áser etedi. Sondaı-aq, qalanyń syrtqy kelbetiniń nasharlaýyna qoǵamdyq oryndarda aýdıo jarnamanyń keń taralýy sebep bolyp otyr. Qazirgi kezde atalǵan áreketter ereje buzý sanatyna jatpaıdy jáne zańnamada oǵan qarsy eshqandaı ákimshilik sharalar kózdelmegen.
«Qazir qaladaǵy trotýarǵa belgili bir dúkenniń nemese basqa da ónimderdiń jarnamasyn baıaýmen jazyp ketetinin kórip júrmiz. Al ákimdiktiń kommýnaldyq qyzmetteri sol túrli shımaı jazý men boıaýlardy óshirip álekke salynyp jatady. Atap aıtqanda, osynyń barlyǵy qalanyń kelbetin usqynsyz kórsetedi. Sonymen qatar, osy jazýlar jolda júrip kele jatqan adamnyń nazaryn aýdaryp, qaýipsizdikke de áser etedi. Sondyqtan osyndaı áreketterge jol bermeýdi qarastyryp otyrmyz. Qazir osynyń bári ákimshilik zań buzý áreketine jatpaıdy. Biraq osyndaı baıaýlar úshin jarnama týraly zańnama aıasynda aıyppul engizýdi usynyp otyrmyz», - dedi Baýyrjan Omarbekov Parlament Májilisinde tilshiler suraǵyna jaýap bere otyryp.
Bul rette, «Jarnama týraly» Zańy aıasynda ashyq keńistikte aýdıo jarnamany taratýǵa tyıym salý, sondaı-aq trotýarlarda, velojoldarda, avtojoldarda jáne kóshelerde syrtqy jarnamany ornalastyrýǵa tyıym salý usynylǵan.
Budan buryn habarlanǵandaı, vıtse-mınıstr páterde turmaıtyn adamdardy tirkeýden shyǵarmaǵany úshin turǵyn úı ıesine aıyppul 2 esege ósetinin aıtty.
