Trotýarda elektrosamokatpen júrýge tyıym salynýy múmkin

ASTANA. KAZINFORM – QR Іshki ister mınıstriniń orynbasary Igor Lepeha Úkimet otyrysynda elektr samokattardy paıdalaný erejelerin qataıtý bastamasyn kóterdi.

Vıtse-mınıstrdiń aıtýynsha, jyl basynan beri elimizde elektr samokattyń qatysy bar 361 jol-kólik oqıǵasy tirkelgen, saldarynan 365 adam túrli dárejede jaraqat alyp, bir adam qaza tapqan.

– Byltyr da Іshki ister mınıstrligi erejelerdi qatańdatý týraly usynys aıtqan edi. Olardyń birazy qoldaý tappady. Osyǵan baılanysty depýtattarmen birlesip, trotýarda elektrosamokatpen júrýge tyıym salýdy kózdeıtin jańa túzetýler ázirlendi, – dedi Igor Lepeha.

Sonymen birge, kıksherıng kompanııalarynyń mindetterin, ákimdikterdiń paıdalaný erejelerin qabyldaý quqyǵy týraly erejelerdi bekitý usynylady.

– Bul da tıimdi shara bolar edi dep oılaımyz: ákim qaı kóshede, qandaı ýaqytta júrýge ruqsat berip, qaısysynda tyıym salý kerektigin ózi anyqtaı alady. Osylaısha aýmaqtardy belgileýge múmkindik týady. Biraq ol kezde depýtattar bizdi qoldamady, sondyqtan osy máselege qaıta toqtaldyq, – dedi mınıstrdiń orynbasary.

Aıta keteıik, jyl saıyn elimizdiń joldarynda 2 myńnan astam adam jol apatynan qaza taýyp, 20 myńnan astamy jaraqat alady.

Sonymen birge, joldardy salý jáne jóndeý kezindegi qaýipsizdik máselesi talqylandy.