Trotýarda elektrosamokatpen júrgender jazalanady: polıtsııa baqylaýdy kúsheıtti
ASTANA. KAZINFORM — Qazaqstanda elektrosamokatpen trotýarlar men jaıaý júrginshiler jolynda júrýge tyıym salyndy. Jyl basynan beri samokattardyń qatysýymen 139 jol-kólik oqıǵasy tirkelip, eki adam qaza tapqan. Osyǵan baılanysty polıtsııa baqylaýdy kúsheıtti. Bul týraly Polisia.kz jazdy.
Elimizde elektrosamokatpen trotýarlar men jaıaý júrginshiler jolymen júrýge zańmen tyıym salyndy.
Sońǵy jyldary bul máseleni turǵyndar jıi kóterip júrdi. Óıtkeni trotýarda eń aldymen jaıaý júrginshiler ózderin qaýipsiz sezinýi kerek. Ásirese balalar, qarttar, balamen júrgen ata-analar úshin bul óte mańyzdy.
Statıstıka da máseleniń ózekti ekenin kórsetip otyr. Jyl basynan beri elektrosamokattardyń qatysýymen 139 jol-kólik oqıǵasy tirkelip, eki adam qaza tapty.
Elektrosamokattarǵa tyıym salynyp otyrǵan joq. Tek olardy qaı jerde jáne qandaı tártippen paıdalanýǵa bolatyny naqty belgilendi. Polıtsııa jańa talaptardyń saqtalýyn tolyq baqylaýǵa daıyn.
Mınıstrliktiń dereginshe, baqylaý tek kóshedegi patrýldermen shektelmeıdi. Beınebaqylaý kameralary, tehnıkalyq tirkeý quraldary jáne drondar paıdalanylady. Al iri qalalarda elektrosamokatpen júretin polıtsııanyń mobıldi toptary jumys istep jatyr. Bul olarǵa samokattar kóp júretin jerlerde jedel áreket etýge múmkindik beredi.
Sondyqtan polıtsııa qyzmetkeri kórinbese, baqylaý joq degen sóz emes. Quqyq buzýshylyq tehnıkalyq quraldar arqyly da tirkelip, zań aıasynda tıisti sharalar qabyldanady.
Elektrosamokattardy jalǵa beretin kompanııalarǵa talap qoıyldy. Barlyq operatorlardyń jańa erejeler týraly habary bar jáne olardy oryndaýǵa mindetti.
— Bizdiń basty mindetimiz — jańa talaptardyń is júzinde oryndalýyn qamtamasyz etý. Trotýar jaıaýlar úshin qaýipsiz bolý kerek, al elektrosamokatty paıdalanýshylar belgilengen tártipti saqtaýy qajet. Bul ózgeristerdiń artynda qoǵamnyń qaýipsizdikke degen suranysy tur. Endigi mindet — jańa talaptar saqtalýy qajet. Polıtsııa óz tarapynan tıisti baqylaýdy qamtamasyz etedi, — dep atap ótildi ІІM-de.
Aıta keteıik, buǵan deıin zańger elektrosamokat júrgizýshilerine qoıylatyn jańa talaptardy túsindirgen bolatyn.
