Trolleıbýs tizgininde esinen tanyp qalǵan júrgizýshiniń jaǵdaıy belgili boldy
ALMATY. QazAqparat - Almaty dárigerleri trolleıbýs tizgininde esinen tanyp qalǵan júrgizýshisiniń jaǵdaıy týraly aıtyp berdi, dep habarlaıdy Qazaqparat tilshisi.
«Er adam №7 aýrýhanaǵa jetkizildi. Tekserý kezinde oǵan Mellorı-Veısa sındromy qoıyldy. Sonymen qatar júrgizýshi kóp qan joǵaltqan. Dárigerler barlyq qajetti sharany jasady. Patsıentti qaraǵan neırohırýrg, hırýrg, travmatolog dárigerler onyń mı jaraqaty joq ekendigin rastady. Qazir onyń jaǵdaıy birqalypty aýyr. Hırýrgııalyq bólimshede em qabyldap jatyr. Barlyq qajetti medıtsınalyq kómek kórsetilip jatyr»,- dedi qalalyq Qoǵam densaýlyqty saqtaý basqarmasynyń baspasóz qyzmetinen.
Oqys oqıǵa keshe shamamen saǵat 23:20-de bolǵan edi. Trolleıbýs júrgizýshisi Q.Sátbaev kóshesimen shyǵysqa qaraı avtoparkke kele jatqan. Rozybakıev kóshesine jetkende onyń qan qysymy kóterilip, ol esinen tanyp qalǵan. Trolleıbýs kóshede turǵan Lexus GS300 jáne Honda Accord kólikterin soǵyp, trotýarǵa shyǵyp ketken jáne jaıaý júrginshini qaǵyp ketken. Kelgen dárigerler jaıaý júrginshigemedıtsınalyq kómek kórsetti, biraq er adam aýyr jaraqattan sol jerde qaıtys boldy.
