Tirkelmegen dári-dármek ákelýge arnalǵan elektrondy ruqsattyń jańa formasy engizildi
ASTANA. KAZINFORM – QR Densaýlyq saqtaý mınıstrligi tirkelmegen dári-dármekterdi ákelýge arnalǵan elektrondyq ruqsat formasyn jańartty. Jumys Joǵary aýdıtorlyq palatanyń nusqamasy boıynsha júrgizildi.
Joǵary aýdıtorlyq palata bıyl Densaýlyq saqtaý mınıstrligi men onyń vedomstvolyq baǵynysty uıymdarynyń qyzmetine memlekettik aýdıt júrgizip, azamattar men mekemelerdiń dári-dármekpen jáne medıtsınalyq buıymdarmen qamtamasyz etilýin teksergen edi.
Aýdıt qorytyndysy boıynsha Densaýlyq saqtaý mınıstrligine Tsıfrlyq damý mınıstrligimen birlesip tirkelmegen dárilik zattardy ákelýge arnalǵan elektrondyq ruqsat formasyn qoldanystaǵy ákelý jáne osyndaı ruqsattardy berý boıynsha memlekettik qyzmet kórsetý qaǵıdalaryna sáıkestendirý tapsyryldy.
- Nátıjesinde Densaýlyq saqtaý mınıstriniń buıryǵymen kórsetilgen qaǵıdalarǵa tıisti ózgerister engizildi. Endi tirkelmegen dári-dármekterdi ákelýge arnalǵan elektrondyq ruqsat formasy kózdelgen.
27 qyrkúıekte «Qazaqstan Respýblıkasynda tirkelgen jáne tirkelmegen dárilik zattar men medıtsınalyq buıymdardy ákelýge (áketýge) kelisim jáne (nemese) qorytyndy (ruqsat berý qujatyn) berý» jańartylǵan memlekettik qyzmeti engizildi, - dep jazdy palatadan..
Elicense.kz portalynda shyǵys qujattyń formasy jańartyldy.
Elektrondyq ruqsattyń jańa formasyn engizý dári-dármekter men medıtsınalyq buıymdardyń qozǵalysyn dálirek baqylaýdy qamtamasyz etedi. Bul óz kezeginde memlekettik retteýdiń tıimdiligin jáne qazaqstandyqtar úshin qajet preparattardyń qoljetimdiligin arttyrady.
Aıta keteıik, bıýdjet qarajatyn jymqyrǵan: «SQ-Farmatsııa» kompanııasyna qatysty tergeý júrip jatyr.