«Trıýmf» balynda halyqaralyq olımpıadalardyń 365 júldegeri bas qosady
ASTANA. QazAqparat - Aǵymdaǵy jyly elordada ótetin «Trıýmf» balynda ǵylymı jobalar boıynsha ótken halyqaralyq olımpıadalardyń 365 jeńimpazy men júldegeri bas qosady. Bul týraly búgin №6 mektep-gımnazııada ótken sońǵy qońyraýǵa arnalǵan saltanatty jıynda Astana qalalyq bilim basqarmasynyń basshysy Elmıra Sýhanberdıeva aıtty.
«Ádettegideı elordadaǵy Táýelsizdik saraıynda «Trıýmf» baly ótip, onda aǵymdaǵy jyly halyqaralyq olımpıadalardyń 365 jeńimpazy men júldegeri bas qosatyn bolady», - dedi ol.
Qalalyq basqarma basshysynyń sózine qaraǵanda, bıyl elorda mektepterinde 13 myń bala birinshi synypty aıaqtasa, 2015 jyldyń qyrkúıeginde 15200 bala alǵash ret mektep tabaldyryǵyn attaıdy.
«Ózderińizde bilesizder, bizde jyl saıyn birinshi synypqa qabyldanatyn balalar sany artyp keledi. Osyǵan oraı elordada mektep qurylystary da qarqyndy júrgizilýde. Eger, 2013-2014 jyldary biz 5 mektepti paıdalanýǵa bersek, aǵymdaǵy jyly taǵy 3 mektep oqý jylyna tolyq daıyn bolady», - dedi ol.
Aıta keteıik, bıyl elorda mektepterin 4407 túlek bitirdi. Onyń ishinde 180-nen astamy «Altyn belgige» úmitker. Olardyń naqty sany Ulttyq biryńǵaı testileýden keıin belgili bolady.
