TRIPP jobasy Qazaqstan men Eýropa arasyndaǵy baılanysty kúsheıtedi – armıan saıasattanýshysy

ASTANA. KAZINFORM – Ortalyq Azııa elderinen, sonyń ishinde Qazaqstannan shyǵatyn energoresýrstar Armenııanyń ońtústik aımaǵy arqyly ótetin TRIPP tranzıttik jobasy arqyly jetkizilýi múmkin. Atalǵan baǵyt Orta dálizdiń áleýetti býyny retinde qarastyrylyp otyr. Bul týraly Kazinform agenttiginiń tilshisine armıan saıasattanýshysy, «Halyqaralyq kommýnıkatsııalardy damytý ınstıtýty» gýmanıtarlyq qorynyń dırektory Arman Gýkasıan málim etti.

Sarapshynyń aıtýynsha, Qazaqstan men Armenııa bul aımaqqa aıtarlyqtaı qyzyǵýshylyq tanytyp otyr. Onyń aıtýynsha, mundaı yntymaqtastyqtyń qalyptasýyna Qazaqstan Prezıdenti Qasym-Jomart Toqaevtyń Armenııa men Ázerbaıjan arasyndaǵy qaqtyǵysty retteýge qosqan mańyzdy úlesi de yqpal etken.

– Armenııa tranzıttik marshrýtty damytý boıynsha túrli ınvestıtsııalyq usynystardy qarastyrýǵa daıyn. Bul másele bıyl Armenııa Premer-mınıstriniń Qazaqstanǵa sapary barysynda eki el basshylyǵy arasyndaǵy mańyzdy taqyryptardyń birine aınalýy múmkin. Qazaqstandyq ınvestıtsııalar Eýrazııalyq ekonomıkalyq odaqqa ortaq múshelik pen ekijaqty senimdi qarym-qatynastardy eskersek, Armenııa ekonomıkasynyń turaqtylyǵyn arttyra alady, – dedi ol.

EAEO aıasyndaǵy áriptestik týraly pikir bildirgen A.Gýkasıan Armenııa ekonomıkasynyń negizgi kórsetkishteri turaqty ósim kórsetip otyrǵanyn, al odaqtan tys balama baǵyttyń jaqyn ýaqytta kórinbeıtinin atap ótti.

– Statıstıka ekonomıkalyq baılanystardyń joǵary deńgeıin aıǵaqtaıdy. Armıan aýyl sharýashylyǵy ónimderiniń 85 paıyzy Eýrazııalyq ekonomıkalyq odaq elderine, sonyń ishinde Qazaqstanǵa eksporttalady. 2024 jyly Armenııanyń EAEO-men taýar aınalymy 12–14 mlrd dollar shamasynda boldy. Al Eýropalyq odaqqa eksport kólemi – 2,1 mlrd dollar, bul alty ese tómen kórsetkish. Eýropa baǵytyna jedel dıversıfıkatsııa jasaý eki sebepke baılanysty qıyn. Atap aıtqanda, logıstıkanyń qymbattyǵy jáne eýrostandarttarǵa beıimdelý úshin uzaq ýaqyt qajet bolýy. Munyń barlyǵy ekonomıkalyq kórsetkishterdiń álsireýine alyp kelýi múmkin, – dedi saıasattanýshy.

Buǵan deıin Qazaqstandyq bıdaıdyń sapasy Armenııada joǵary baǵalanatynyn jazǵanbyz.

Aıta keteıik, Armenııa AQSh-pen birge TRIPP baǵytyn jalǵa alý merzimin talqylap jatyr.