Trıpolıdegi narazylyq kezinde bir adam opat boldy
ASTANA. KAZINFORM — Lıvııanyń Ulttyq birlik úkimeti (UBÚ) kúshteriniń atqylaýynan Trıpolı ortalyǵynda bir sherýshi qaza taýyp, birneshe adam jaralandy, dep jazady TASS.
Agenttik málimetinshe, UBÚ premer-mınıstri Abdel Hamıd Dbeıbanyń shtab-páteri mańynda narazy topqa oq jaýdyrylǵan. Olar Abdel Hamıdtiń otstavkaǵa ketýin talap ettti. Óz kezeginde Trıpolıde otyrǵan úkimet Dbeıbanyń keńsesine basyp kirý áreketiniń aldyn alǵany týraly málimdeme jasady.
Sonymen qatar, Lıvııa Press agenttiginiń habarlaýynsha, narazylyqtardyń kúsheıýine jaýap retinde Dbeıba kabınetindegi jeti mınıstr men tórt orynbasary otstavkaǵa ketý týraly ótinishterin bergen. Olardyń qatarynda Densaýlyq saqtaý mınıstri, Turǵyn úı jáne qurylys mınıstri, Jergilikti ózin-ózi basqarý mınıstri, Sý resýrstary mınıstri, Ekonomıka mınıstri, sondaı-aq Mádenıet, Indýstrııa jáne mıneraldy resýrstar mınıstri bar.
Dál osy sátte Trıpolı ortalyǵyna myńdaǵan narazylyq bildirýshi jınalyp, UBÚ-niń otstavkaǵa ketýin talap etti. Barlyq aımaqtan kelgen lıvııalyqtar toby Jasyl alań men premer-mınıstrdiń shtab-páterine qaraı aǵylyp jatyr. Sherýshiler Dbeıba men onyń úkimetindegi Іshki ister mınıstrliginiń basshysy Imad Trabelsıdiń syzylǵan portretin ustap shyqty. Lıvııa Press agenttigi taratqan beınematerıaldarǵa súıensek, narazylyq bildirýshiler «Halyq úkimettiń qulaǵanyn qalaıdy» jáne «Dbeıba, sen qorqaq ári amerıkalyq agentsiń» dep urandaǵan.
Trıpolıdegi jaǵdaı dúısenbi kúni keshke Mahmýd Hamzanyń 444-shi jaýyngerlik brıgadasy men qaýipsizdik pen turaqtylyqty qamtamasyz etý apparaty arasynda qaqtyǵys bastalǵanda ýshyǵa tústi. Oqıǵanyń shıelenisýine shtab basshysy Abdelganı ál-Kıklıdiń ólimi sebep boldy.
Qaqtyǵys birneshe saǵatqa sozyldy, sodan keıin GNA-daǵy Qorǵanys mınıstrligi Trıpolıdegi qaýipsizdik operatsııasynyń sátti aıaqtalǵanyn habarlady, al Dbeıba qaladaǵy qaýipsizdik qyzmetterin qaıta qurylymdaýǵa baǵyttalǵan birneshe sheshim jarııalady. Bul sheshim narazylyq týdyryp, jańa qaqtyǵystarǵa ákeldi. Lıvııa aqparat quraldarynyń habarlaýynsha, bir túnniń ishinde beıbit turǵyndardy qosqanda keminde 6 adam qaza taýyp, 70-ke jýyq adam jaralanǵan.
Sársenbi kúni keshke Trıpolıde alǵashqy sherýler ótti. Turǵyndar qantógis úshin Dbeıba úkimetin aıyptap, onyń otstavkaǵa ketýin talap etti.
Buǵan deıin Lıvııada qarýly top jetekshisiniń ólimi týraly habardan keıin qaqtyǵystar bastalǵany málim boldy.