Trıpolıde Kaddafıdiń rezıdentsııasy jermen-jeksen etildi
ASTANA. 21 naýryz. QazAqparat - Lıvııaǵa jasalǵan áýe shabýylynyń nátıjesinde Mýammar Kaddafıdiń rezıdentsııalarynyń biri jermen-jeksen etildi, dep habarlady RBK agenttigi.
Lıvııa basshysynyń dala jaǵdaıyndaǵy baspasóz ortalyǵynan 100 metrdeı jerde ornalasqan úshqabatty ákimshilik ǵımarat órtke orandy, dep habarlady brıtandyq Sky News telearnasy.
Ǵımarattyń qasbeti tolyq qıraǵany aıtylýda. Zardap shekkender týraly málimet joq. Brıtandyq telearnanyń habarlaýynsha, ǵımarattyń tóńiregine jınalǵan Kaddafıdiń jaqtaýshylary, bul soqqy - koalıtsııa «ýáde etken» birinshi shabýyl ekenin málim etýde.
Biraq ta buǵan deıin Pentagon ókili vıtse-admıral Bıll Gortnı, polkovnık M.Kaddafıdiń saraıy koalıtsııanyń shabýylyna ushyraıtyn strategııalyq nysandardyń tizimine kirmeıtinin málim etken bolatyn.
Ulybrıtanııa Lıvııa aýmaǵyna shabýyldy jandandyrǵany habarlanyp otyr: súńgýir qaıyqtar lıvııalyq áýe qorǵanysy kúshterine qarsy birneshe «Tomogavk» zymyrandaryn ushyrǵan. «BUU Qaýipsizdik keńesiniń qararyn oryndaý jónindegi birlesken operatsııanyń aıasynda Ulybrıtanııa jerorta teńizindegi «Trafalgar» súńgýir qaıyǵynan birneshe «Tomagavk» zymyrandaryn taǵy da ushyrdy», dep málim etti brıtan qorǵanys mınıstrliginiń ókili general-maıor Djon Lorımer.
Trıpolıdegi oqıǵa, Lıvııa armııasy basshylyǵynyń atys-shabysty dereý toqtatý týraly osynyń aldyndaǵy málimdemesine qaramastan, órbip otyr.
