Trıestte Italııanyń soltústik oblystaryn azat etý kezinde qaza bolǵan keńes jaýyngerlerine qulpytas ashyldy

ASTANA. Mamyrdyń 1-i. QazAqparat - Italııanyń Azat bolýy jáne birigý kúni - sáýirdiń 25-inde - Trıest qalasyndaǵy áskerı zıratta Italııanyń soltústik oblystaryn azat etý kezinde qaza tapqan ıÝgoslavııanyń Halyq-azattyq armııasynyń «orys batalonynyń» 104 keńes jaýyngerin eske alýǵa arnalǵan eskertkishtiń ashylý rásimi boldy. Bul batalonnyń quramynda 36 qazaq jaýyngeri shaıqasqan.

Qaza tapqan jaýyngerlerdi izdeý sharasyna soǵys ardageri, jazýshy Qalmuqan Isabaı uıytqy bolǵanyn aıta ketý kerek. Qazaqstannyń Italııadaǵy Elshiligi jaýyngerler jerlengen jerler men olardyń aty-jónderin anyqtaý jumysyn 4 jyl boıy júrgizip keldi, nátıjesinde osy qulpytas boı kóterip otyr, dep habarlady syrtqy saıasat vedomstvosynyń baspasóz qyzmetinen.

Eskertkishtiń ashylý rásimine ardagerler Kamalı Dúısembekov, Anatolıı Ogaı, Orýsh Tursynov jáne Qazaqstan halqy Assambleıasynyń ókilderi qatysty.

Saltanatty rásimde sóz sóılegen Qazaqstan Elshisi Almaz Hamzaev jaýyngerlerdiń zırattaryn izdeý jáne olardyń aty-jónderin anyqtaýda jan-jaqty kómek kórsetken, eskertkish ornatý úshin Trıest áskerı zıratynan jer bólgen ıtalıan ókimetine alǵys bildirdi jáne bul ataýly oqıǵanyń ekijaqty mádenı-gýmanıtarlyq yntymaqtastyqty nyǵaıtýda jáne óskeleń urpaqty tárbıeleýde Italııa úshin de, Qazaqstan úshin de mańyzdy ekenin atap kórsetti.

Qazaqstan delegatsııasy sondaı-aq, Trıest qalasyndaǵy burynǵy «Rızıera dı San Saba» natsıstik kontsentratsııalyq lageriniń qabyrǵasynda ótkizilgen memorıaldyq mıtınge qatysty, natsıstik rejım qurbandaryn eske alý eskertkishine gúl shoqtaryn qoıdy.