Trıatlonnan Álem kýbogy: Erler arasyndaǵy saıysta reseılik sportshy jeńimpaz atandy
ASTANA. QazAqparat - Astanada trıatlonnan erler arasyndaǵy Álem Kýbogy kezeńi aıaqtaldy, dep habarlaıdy QazAqparat tilshisi.
Onda reseılik sportshy Dmıtrıı Polıanskıı top jardy. Ekinshi oryndy aýstralııalyq Marsel Ýolkıngton ıelense, úshinshi oryndy - frantsýz Orelıan Rafael jeńip aldy. Al qazaqstandyq Semen Pıvovarov márege 55-shi bolyp jetti. Jeńimpazdardy QR Mádenıet jáne sport mınıstri Arystanbek Muhamedıuly marapattady.
«Dál osyndaı nátıjeni kúttim. Biraq kútý bir basqa da, sol nátıjege jetý bir basqa. Onyń ústine bul maýsymda ekinshi ret saıysqa túsip otyrmyn, ótken aptada óte uzaq júgirgenmin», - dep atap ótti chempıon.
Atap ótken jón, bastapqyda reseılik sportshy avstralııalyq pen frantsııalyq sportshydan qalyp kele jatqan bolatyn. Alaıda, úshinshi aınalymda jyldamdyǵyn arttyryp, qarsylastaryn basyp ozdy.
Eske sala ketsek, Astanada trıatlonnan Álem Kýbogy ótip jatyr. Búgin áıelder arasyndaǵy dýatlonnan Álem Kýbogynyń jeńimpazdary anyqtaldy. Jarys máresine alǵashqy bolyp frantsııalyq Sandra Dodı jetti. Ekinshi bolyp onyń otandasy Emıl Mýre kelse, ıtalııalyq Anjelıka Olmo úzdik úshtikti túıindedi. Qazaqstandyq sportshy Anastasııa Avtýshko jarystan shyǵýdy uıǵardy.
20 mamyr kúni Qazaqstandaǵy trıatlon sportyn nasıhattaý men damytý maqsatynda Age Group (áýesqoılar) arasynda saıys bolady.
