Trıatlon federatsııasynyń prezıdenti úzdik bapkerlerdi marapattady
ASTANA. QazAqparat - Astanada Trıatlon federatsııasynyń prezıdenti Kárim Másimovtiń tóraǵalyǵymen jyl saıynǵy kongress ótti, dep habarlaıdy QazAqparat.
Jıynǵa QR Mádenıet jáne sport mınıstri Arystanbek Muhamedıuly, QR Ulttyq Olımpıadalyq komıtetiniń bas dırektory Serik Qasqabasov qatysty.
Kongress barysynda 2017 jyl qorytyndylanyp, keler jyldyń maqsat-mindetteri aıqyndaldy. Jıyn barysynda 2018 jyl elimizdiń trıatlony úshin sharalarǵa toly jyl bolatyny sóz boldy. Trıatlonnan jarystar kelesi jyly shymyldyǵyn aqpan aıynda Astanada túretin bolady.
Kongress kezinde federatsııa prezıdenti Kárim Másimov otandyq sportty damytýǵa úles qosyp jatqan trıatlon bapkerlerin qurmet gramotalarymen marapattady.
Sonymen qatar, federatsııanyń birinshi vıtse-prezıdenti Dáýren Jaqsybek federatsııa prezıdentine osydan birneshe kún buryn «Jyldyń sporttyq júldesi» baıqaýynda «Olımpıadalyq sport túrleri boıynsha úzdik sporttyq federatsııa» nomınatsııasynda jeńip alǵan júldesin tabys etti.
