Trıatlon: Arlan Jańabaı Qytaıda ótip jatqan Azııa kýbogy kezeńinde qola medal jeńip aldy
ASTANA. KAZINFORM - Trıatlonnan Qazaqstan quramasynyń ókili Arlan Jańabaı Qytaıdyń Taıchjoý qalasynda ótip jatqan Azııa kýbogy kezeńinde qola medal jeńip aldy, dep habarlaıdy Qazaqstan Ulttyq olımpıadalyq komıteti.
Otandasymyz jarys jolyn 54:43 ýaqytta eńserip, júldegerler qatarynan kórindi.
Altyn medaldi reseılik Roman Mıneev ıelendi - 54:31. Qytaı sportshysy Mınsıýı Lı 54:34 ýaqyt kórsetkishimen ekinshi oryn aldy.
Sondaı-aq Aıan Beısenbaev jarysty 11-orynmen aıaqtady (55:17). Maksım Shmýlıch 26-nátıje kórsetti (56:13), al Temirlan Temirov 28-orynǵa turaqtady (56:35).
Osyǵan deıin Ispanııada ártistik júzýden Qazaqstan qorjynyna ekinshi júlde túskeni týraly jazdyq.
