Treılerdi jalǵa berý: ShQO-da týrızmniń jańa túri paıda bolmaq
ÓSKEMEN. QazAqparat - ShQO-da týrızmniń jańa túrin damytý týraly usynys aıtyldy, dep habarlaıdy «QazAqparat» HAA.
Treılerdi jalǵa berýdi damytýǵa baılanysty qazir ShQO basshylyǵy AQSh pen Qytaıdyń tájirıbesin zerttep jatyr. Bul týraly ShQO týrızm jáne syrtqy baılanystar basqarmasynyń basshysy Jasulan Sársebaev aıtty.
«Bizdiń ulttyq tabıǵı parkter men qoryqtar úshin bul týrıster tartýdyń naǵyz paıdaly joly bolmaq. Qazir 5 juldyzdy qonaqúıden kóri adam aıaǵy sırek tıetin tumsa tabıǵat aıasynda bolýdy qalaıtyn týrıster kóp. Tek sol tabıǵat aıasyna jetkizetin ınfrastrýktýra durys bolýy kerek», - dedi Jasulan Sársebaev.
ShQO basshylyǵy AQSh-taǵy tabıǵaty Altaıǵa uqsas Montana shtatynyń tájirıbesin mysalǵa keltiredi. Ol jerde táýligine 2 myń treılerge deıin jalǵa beriletin arnaıy turaqtar bar. Kólik-úıdiń ishinde jatyp, tabıǵat aıasynda demalyp kelýińniń bir kúni - 25 dollardyń aınalasynda eken. Treıler adamǵa qajet barlyq yńǵaıly dúnıelermen jabdyqtalǵan.
Qytaıdyń da tájirıbesi osyǵan uqsas. Úı-kólikti jalǵa alyp qydyrý ol jaqta da sánge aınalǵan. Kólikti júrgizýshisimen bir táýlikke jalǵa alý bizdiń baǵamen 50 myń teńge eken. Bul bir kúnde 300 shaqyrymǵa deıingi qashyqtyqty qosa eseptegende.
ShQO týrızm basqarmasynyń mamandary saıahattyń mundaı túri elimizdiń shyǵysynda da úlken suranysqa ıe bolýy múmkin ekenin aıtady. Jol máselesinen de eshqandaı qıyndyq týyndamaýy qajet. Sebebi, sońǵy eki jylda ShQO-daǵy eń tanymal demalys oryndaryna aparatyn tas joldardyń barlyǵy kúrdeli jóndeýden ótken.
