Tretıakov galereıasynda «Qazaqstan óneriniń jaýharlary» kórmesi ashyldy
ASTANA. KAZINFORM — Máskeýdiń Tretıakov galereıasynda Ábilhan Qasteev atyndaǵy QR Memlekettik óner mýzeıi ázirlegen «Qazaqstan óneriniń jaýharlary» atty kórmeniń shymyldyǵy túrildi, dep habarlaıdy Mádenıet jáne aqparat mınıstrligi.
Іs-shara Reseı Federatsııasynda Qazaqstan Respýblıkasynyń mádenı kúnderi aıasynda ótip jatyr. Saltanatty rásimge QR Mádenıet jáne aqparat mınıstri Aıda Balaeva bastaǵan qazaqstandyq delegatsııa qatysty.
— Reseıdegi Qazaqstannyń mádenı kúnderi — eki el arasyndaǵy yntymaqtastyqtyń mańyzdy kezeńi, úzdiksiz dıplomatııalyq dıalogtyń jemisi. Bul aýqymdy joba Máskeýdiń jetekshi mádenıet alańdaryn qamtyp, Qazaqstannyń zamanaýı mádenı jetistikteriniń keń palıtrasyn — teatr men mýzykadan bastap, kıno jáne beıneleý ónerine deıin usynady. Keıingi 34 jylda Máskeýde qazaq sýretshileriniń kórmesi alǵash ret ótip otyr. Á. Qasteev atyndaǵy Memlekettik óner mýzeıiniń kartınalary «Krymskıı val» galereıasynda eń sońǵy ret 1991 jyldyń tamyzynda qoıylǵan edi. Sondyqtan búgingi ekspozıtsııany biz Qazaqstan men Reseı arasyndaǵy mádenı baılanystardy nyǵaıtýdaǵy jarqyn oqıǵa ári jańa beles dep baǵalaımyz, — dedi Aıda Balaeva.
Á. Qasteev atyndaǵy Memlekettik óner mýzeıiniń «Qazaqstan óneriniń jaýharlary» kórmesi XX ǵasyrdaǵy talantty sheberlerdiń 60-tan astam keskindeme jáne músin týyndylaryn qamtıdy.
Ulttyq beıneleý óneri mektebiniń qalyptasýy Ábilhan Qasteevtiń esimimen tyǵyz baılanysty. Onyń týyndylary ótken ǵasyrdyń basynda kóshpendiler ómirindegi qarqyndy ózgeristerin beıneleıtin kórkem shejirege aınaldy.
Kórme 23 qarashaǵa deıin jalǵasady. Kórmege kelýshiler belgili qazaqstandyq músinshiler Tólegen Dosmaǵambetov, Erkin Mergenov, Olga Prokopeva jáne Esken Sergebaevtyń eńbekterimen tanysa alady. Bul týyndylar qazaq músin óneriniń tutas bir býynynyń shyǵarmashylyq izdenisteri men kórkemdik ustanymdaryn aıqyn kórsetedi.
10-13 qazan aralyǵynda qazaqstandyq jáne sheteldik kórermeniniń kóńilinen shyqqan «Vremıa patrıotov», «Toqta, tún!», «Dos-Muqasan», «1941 jyldyń jazy», «90+1» fılmderi men «Altyn adam» mýltfılmin kóre alady.
Barlyq fılm qazaq jáne orys tilderinde kórsetiledi.
Reseılik kórermen úshin 13 qazan kúni Kishi teatr sahnasynda «Parasat maıdany» spektakli qoıylady. Qoıylym — zamanaýı adamnyń rýhanı izdenisteri men ishki álemin sýretteıtin psıhologııalyq drama. Qazaq ádebıetiniń klassıgi Tólen Ábdik shyǵarmalary negizinde sahnalanǵan. Spektakldi Q.Qýanyshbaev atyndaǵy Qazaq memlekettik akademııalyq mýzykalyq-drama teatrynyń akterleri sahnalaıdy.
Reseıdegi Qazaqstannyń mádenı kúnderi qarasha aıynda qazaqstandyq ónerpazdardyń gala-kontsertimen qorytyndylanady.
Budan buryn Aıda Balaeva «Ústirt» nysanynyń qujattamasyn ıÝNESKO-ǵa tapsyrǵanyn jazǵanbyz.