«Tresh-strımıng» uǵymy zańǵa engizile me – mınıstr jaýaby
ASTANA. KAZINFORM – Іshki ister mınıstri Erjan Sádenov Quryltaı depýtattarynyń «tresh-strımıng» uǵymyn zańnamaǵa engizýge qatysty saýalyna jaýap berdi.
— «Tresh-strımıng» uǵymyn Qazaqstan Respýblıkasynyń zańnamasyna engizýdi orynsyz dep sanaımyz. Qoldanystaǵy zańnamada, atap aıtqanda, «Onlaın-platformalar jáne onlaın-jarnama týraly» Qazaqstan Respýblıkasynyń Zańynda «onlaın-platformadaǵy kontent» uǵymy anyqtalǵan. Ol aýdıovızýaldy nysandaǵy aqparatty qamtıdy jáne quqyqqa qaıshy jarııalanymdardy (qatygezdikti, zorlyq-zombylyqty, pornografııany jáne t. b. nasıhattaý) taratýǵa tyıym salady, — dedi ol.
Onyń aıtýynsha, «tresh-strımıng» termıni baǵalaý sıpatyna ıe jáne naqty zańdyq mazmuny joq.
— Bul quqyqty qoldanýdyń birjaqty bolýyna ákep soǵýy múmkin. Naqty quqyqqa qaıshy áreketter úshin jaýapkershilik zańnamada qarastyrylǵan. Adam Qylmystyq kodekstiń 174-baby, 274-baby jáne Ákimshilik quqyq buzýshylyq týraly kodekstiń 456-2-baby boıynsha jaýapqa tartylýy múmkin, — dep eskertedi Erjan Sádenov.
Mınıstrdiń jaýabyna qosymsha berilgen aqparatqa qaraǵanda, osy jyldyń 9 aıynda QK 174-baby boıynsha 72 qylmystyq is qozǵaldy.
Onyń ishinde 21 is sotqa joldandy, QK 274-baby boıynsha 64 qylmystyq is tirkelip, 9-y sotqa joldandy. Al ÁQBtK 456-2-baby boıynsha 124 adam jaýapqa tartyldy.
Aıta ketelik Erjan Sádenov onlaın-ortada sýrettik beınesin zańsyz paıdalanǵany jáne balaǵattaǵany úshin azamattardyń shaǵym berý tártibin jetildirý qajet ekenin aıtqan edi.
