Trenıngter azamattarymyzǵa psıhologııalyq jáne qarjylyq zııan keltirip otyr

ASTANA. KAZINFORM – Trenıngter azamattarymyzǵa psıhologııalyq jáne qarjylyq zııan keltirip otyr. Bul týraly Májilistiń jalpy otyrysynda ýákiletti organdarǵa saýal joldaǵan depýtat Jarqynbek Amantaıuly aıtty.

Premer-mınıstrdiń orynbasary – Mádenıet jáne aqparat mınıstrine saýal joldaǵan Májilis depýtaty Aıgúl Quspan áskerı qyzmetti tańdaıtyn jastardyń sany jyldan-jylǵa azaıyp bara jatqanyna alańdaýshylyq tanytty.

- Búginde jarnamasy jańǵyryp turǵan trenıngter azamattarymyzǵa paıda emes, kerisinshe, rýhanı, psıhologııalyq jáne qarjylyq zııan keltirip otyr. Mysal keltireıin. vybor.kz ınternet platformasy arqyly óz qyzmetin belsendi túrde nasıhattaıtyn MINDFULNESS oqý ortalyǵy úsh satyly trenıng usynady. Birinshi, jalpy kýrs – 50 000 myń teńge. Ekinshi, transformatsııalyq kýrs – 95 000 myń teńge. Úshinshi, kóshbasshylyqty damytý kýrsy – 150 000 myń teńge. Onlaın formattaǵy «emotsıonaldyq erkindik» kýrsynyń quny 200 000 myń teńgege jetedi. Osyndaı «kreatıvti oılaýdy», «tıimdi kommýnıkatsııany», «sheshen sóıleýdi» tegin úıretemiz dep ýáde beretin ortalyqtar da az emes. Olardyń qatarynda sheteldik «Vektor», «Lıder-motıvator» sekildi ataýmen jumys isteıtin ortalyqtar bar, - dedi ol.

Májilis depýtatynyń aıtýynsha, olardyń barlyǵynyń jumys isteý ádisi bir. Tańerteń qatysýshylardyń telefondaryn jınap alady. Odan keıin psıhologııalyq jáne moraldyq qysymǵa negizdelgen «aqyl-keńester» arqyly adamnyń jeke keńistigine qol suǵyp, sanasyn birtindep ýlaıdy.

- Sodan keıin ne bolady? Árıne, óziniń talap-mindetterin ońaı oryndata bastaıdy. Kýrstyń birinshi kýrsta adamdy kópshilik aldynda jeke problemasyn ashyq aıtýǵa májbúrleıdi. Biri jylaıdy, biri aıqaılaıdy, biri kúledi, biri bıleıdi. Tipti keıbirine edendi tilimen jalaý, bir-biriniń túkirigin ishkizý sııaqty aıtýǵa aýyz barmas soraqy áreketter jasatady. Ekinshi kýrsta jaǵdaı odan ári ýshyǵady. Qatysýshylarǵa áleýmettik rólin ózgertý mindetteledi: er adamǵa áıel kıimin kıip, kóshede júrý tapsyrylýy múmkin nemese ózin «bomj» keıpine salyp, qoqys mańynda tamaq jeý talap etiledi. Osylaısha bul trenıngter adam sanasyn tájirıbe alańyna aınaldyrady. Al kýrs aıaqtalǵan soń qysymnyń jańa túri bastalady, - dedi Jarqynbek Amantaıuly.

Onyń málimetinshe, qatysýshyǵa mindetti túrde úsh adamdy kýrsqa tartý talaby qoıylady. Oryndaı almasa taǵy da qorqytý, psıhologııalyq qysym, áýelde ózi áshkerelegen qylmystary men aıyptaryn jarııalaý, jobadan shyǵaramyz degen syndy úreı týǵyzady.

- Aı-kúnniń amanynda qarapaıym azamattardy rýhanı kúıretip, psıhologııalyq turǵyda álsiretip, qarjylaı tonaýǵa jol berýge bolmaıdy. Mundaı soraqylyqty trennıg emes, dıstrýktıvti sekta retinde qarap, qatań shara qoldaný kerek degen pikirler de aıtylady qoǵamnan, - dedi ol.

Osyǵan baılanysty Májilis depýtaty ýákiletti organdarǵa tómendegi oryndy talapty qarastyrýdy suraıdy:

- tıisti mınıstrlikter men ýákiletti memlekettik organdar tarapynan atalǵan kýrstardyń baǵdarlamalyq mazmunyna, qoldanylatyn ádistemelerine jáne olardyń zańnamaǵa sáıkestigine resmı tekserý júrgizý;

- azamattardy qorlaý, psıhologııalyq qysym kórsetý, májbúrleý jáne manıpýlıatsııa belgileri bar áreketterge quqyqtyq baǵa berip, anyqtalǵan faktiler boıynsha naqty sharalar qabyldaý.

- osyndaı trenıngtik baǵdarlamalardy lıtsenzııalaý, sertıfıkattaý jáne memlekettik retteý tetigin engizý qarastyrý.

Buǵan deıin Májilis depýtaty Aıdos Sarym ezoterıkter men trener-koýchterdi synǵa alǵan edi.