Tirek jáne shaǵyn mektepterdi jaraqtandyrý jobasy barlyq óńirde engiziledi
ASTANA. KAZINFORM – Shaǵyn jınaqty mektepterdiń áleýetin arttyrý boıynsha Aqtóbe oblysynyń jobasy barlyq óńirge taralady. Bul týraly QR Premer-mınıstri Oljas Bektenov búgingi Úkimet otyrysynda aıtty.
Úkimet basshysy qala men aýyl mektepterindegi oqýshylar biliminde áli de alshaqtyq bar ekenin atap ótti.
«Sondyqtan úzdik bilim oshaqtary ornalasqan óńirlerde tirek mektepter qurý týraly sheshim qabyldandy. Osy oraıda jeke sektordyń jáne qoǵamdyq qorlardyń qatysýymen birneshe joba iske asyrylyp jatyr. Aqtóbe oblysynda «Qazaqstan halqyna» qoǵamdyq qory tirek jáne shaǵyn jınaqty mektepterdi jaraqtandyrýǵa 1 mlrd 800 mıllıon teńge bóldi. Pedagogterdiń biliktiligin arttyrý jáne zamanaýı resýrstarmen jaraqtandyrý arqyly tirek mektepterdiń tájirıbeli muǵalimderi shaǵyn komplektili mektepterdiń oqýshylaryna sabaq beredi. Demek, tirek mektepter shaǵyn mektepterdegi bilim berý deńgeıin kóterýge atsalysýda. Bul jobany basqa óńirlerge de keńinen taratýdy tapsyrdym», - deıdi Premer-Mınıstr.
Sondaı-aq, «Bilim-ınnovatsııa» qory Almaty oblysynyń 42 aýyl mektebinde naqty pánder boıynsha bilim berý sapasyn arttyrý jobasyn qolǵa alǵan.
«Oqý-aǵartý mınıstrligi ákimdiktermen birlesip, 2025 jyldyń sońyna deıin Aqtóbe oblysynyń tájirıbesi negizinde keminde 200 tirek mektepter jelisin qurýy qajet. Aýyl mektepteri muǵalimderiniń biliktilik deńgeıin arttyrý boıynsha júıeli sharalar qabyldańyzdar. Shaǵyn komplektili mektepterdiń áleýetin arttyrý úshin naqty jol kartasy bolýy kerek. Ákimder tirek mektepterde josparlanǵan sharalardyń oryndalýyn baqylaýǵa alýy kerek», - dedi O.Bektenov.
Aıta keteıik, aýyldyq aýmaqtardy damytý tujyrymdamasy sheńberinde 2027 jylǵa deıin 180-ge jýyq mektep salý josparlanǵan. Bıyl «Jaıly mektep» ulttyq jobasyn qosa alǵanda, aýyldarda 42 mektep paıdalanýǵa berildi.
Elimizdegi 8 myńǵa jýyq mekteptiń 67% nemese 5247-si – aýyl mektebi. Oqýshylardyń 40% aýyl mektebinde bilim alady.