Múmkindigi shekteýli balalar úshin mektepte «jeke kómekshi» laýazymy engizilmek

ASTANA. KAZINFORM — Elimizde múmkindigi shekteýli balalarmen qazirgi tańda 9 myń arnaıy pedagog jumys isteıdi. Endigi jerde tirek-qımyl apparatynyń buzylystary bar balalar úshin mektepte «jeke kómekshi» laýazymy qarastyrylýda. Bul týraly Úkimet otyrysynda QR Oqý-aǵartý mınıstri Ǵanı Beısembaev aıtty.

«Múmkindigi shekteýli balalarmen qazirgi tańda 9 myń arnaıy pedagog jumys isteıdi. Byltyrǵy jylmen salystyrǵanda pedagog-assıstentter sany 1 myńnan 2,5 myńǵa artty. Mektepke deıingi uıymdarda da «pedagog-assıstent» laýazymy engizilýde. Tirek-qımyl apparatynyń buzylystary bar balalar úshin mektepte «jeke kómekshi» laýazymy qarastyrylýda. «Pedagog» kásiptik standartyna múmkindigi shekteýli balalarmen jumys boıynsha jańa mamandyqtar qosylýda», — dedi mınıstr. 

Sondaı-aq, vedomstvo basshysy pedagogterdiń biliktiligin arttyrý jumystary turaqty júrgizilip jatqanyn aıtty. 

«Bıyl kýrstardan 5 myń pedagog ótti. Erekshe bilim berý qajettiligi bar balalar sanynyń artýyna baılanysty týyndaǵan 3,5 myń arnaıy maman qajettiligin sheshý baǵytynda kelesi oqý jylynan bastap kolledjder «pedagog-assıstentterdi» daıarlaýdy bastaıdy, tıisti buıryq qabyldandy. Arnaıy pedagog tapshylyǵy bar Almaty (582), Astana (525), Shymkent (367) qalalary, Túrkistan (256) jáne Mańǵystaý (208) oblystary qajetti mamandarmen qamtamasyz etý suraǵyna basa kóńil bólýdi qajet etedi», — dep túıdi sózin Ǵanı Beısembaev. 

Aıta keteıik, elimizde 203 myń múmkindigi shekteýli bala tirkelgen.