Travmatolog dárigerler astanalyqtarǵa úndeý jasady

ASTANA. KAZINFORM — Qys mezgiline qaramastan elordada balalardyń terezeden qulaý faktileri azaımaı tur. Osy máselege qatysty dárigerler astanalyqtarǵa úndeý jasady.

Qoǵamdyq densaýlyq saqtaý basqarmasynyń málimetinshe, jyl basynan beri joǵary qabattyń terezesinen úsh bala qulap ketken.

Dárigerler atap ótkendeı, balalardyń terezeden qulap ketýine qatysty qaıǵyly oqıǵalardyń artynda ata-ananyń abaısyzdyǵy jatyr.

— Jyl basynda aýrýhanamyzdyń jansaqtaý bólimine túrli jaraqat alǵan nemese súıekteri synǵan eki bala aýyr halde jetti. Keıin olar medıtsına qyzmetkerleriniń baqylaýymen travmatologııa bólimine aýystyryldy. Balalarda kóbinese omyrtqanyń, qoldyń jáne aıaqtyń synýy, bas mıynyń jaraqaty jáne aǵzalarynyń jarylýy bolady. Biz eresekterden balalaryn úıde jalǵyz qaldyrmaýyn qatań túrde talap etemiz. Onyń arty qaıǵyly oqıǵaǵa aınalýy múmkin, — dep eskertti Astana qalasyndaǵy № 2 kópsalaly qalalyq balalar aýrýhanasynyń travmatologııa bóliminiń meńgerýshisi Baımahanbet Sádýov.

Aýrýhananyń málimetinshe, ótken jyly balalardyń terezeden qulaýynyń 63 oqıǵasy tirkeldi, onyń ishinde 33 bala aýyr jaǵdaıda aýrýhanaǵa jatqyzyldy; 4 jaǵdaıda bala qaıtys boldy.

Eresekterge arnalǵan qarapaıym qaýipsizdik erejeleri týraly eskertý:

* Terezesi ashyq nemese balkon esigi ashyq bólmede balalardy eshqashan jalǵyz qaldyrmańyz.
* Balalardy terezeniń aldyna shyǵýyna jol bermeńiz.
* Terezeniń aldyna shyǵyp alýǵa yńǵaıly jıhazdar bolmaýy qajet.
* Terezelerdi arnaıy qulyptaý qurylǵylarymen jabdyqtaý qajet.

Osy jaǵdaıda moskıt torlarynyń qaýiptiligine de kóńil bólý kerek.

— Másele mynada, moskıt torlary qaýipsiz bolyp elesteýi múmkin. Al shyn máninde moskıt torlary, tipti, kishkentaı balanyń salmaǵyn kótere almaıdy, — dep qosty dáriger.

Buǵan deıin habarlanǵandaı, elordada polıtsııa qyzmetkeri kóz jumdy.