Travmatologııada bekitpe quraldarǵa mol qarjy bólinýi tıis - maman
Konferentsııada jaraqatty tańý, súıekti bekitý, gıps salý sekildi jumystardy atqarý, asqynýdyń aldyn alý, qarttyqpen birge keletin býyn aýrýlaryn emdeý jaıy talqyǵa tústi. Ásirese, elimizde jol-kólik apaty kezinde jaraqat alyp, kóz jumatyndar qatary artyp keledi. Sondyqtan bul salaǵa jiti nazar aýdaryp, qosalqy bólshekter, ıaǵnı, bekitpe quraldary men burandalarǵa mol qarjy bólý usynyldy.
«2010 jyldan bastap Aqtóbede travmatologııa men ortopedııa bólimi jumys istep tur. Ózimiz tize, jambas býyndaryn aýystyryp júrmiz. Barlyǵy 500-den astam ota jasaldy. Bizde qajetti apparattar men arnaıy kereýetter bar. Biraq jaraqat alǵan adam sany kóbeıip, súıekterdiń bekitpe quralyna suranys artty. Biz dárimen emdemeımiz, sondyqtan osy baǵytqa qosymsha qarjy bólse degen usynys bar»,- deıdi travmatolog dáriger Serik Isaev.
Aıta keteıik, konferentsııaǵa Germanııa, Túrkııa, Polsha, Serbııa , Avstrııa, Qytaı sekildi 10 eldiń úzdik dárigerleri qatysyp, tájirıbe almasady. Óńir basshysy kóshpeli Eýropa kongresin aldaǵy jyldary Aqtóbede ótkizýge usynys jasady.
«Ótken jyly 6 eldiń ortopedterin qosyp, konferentsııa ótkizdik. Bıyl 10 eldiń travmatologtary kelip, tájirıbe almasyp jatyr. Endi 2019 nemese 2020 jyly travmatologtar men ortopedterdiń kóshpeli Eýropa kongresin ótkizýdi usynamyz»,- dedi oblys ákimi Berdibek Saparbaev.
Statıstıkalyq málimetke súıensek, jyl saıyn elimizde 2400 adam jol-kólik oqıǵasynda alǵan jaraqatynan kóz jumady. Al 23 myń adam túrli jaraqat alady. Barlyǵy 800 adam alǵan jaraqatynan múgedek bolyp qalady.
«Búgingi konferentsııada sheberlik sabaǵy ótip, 7 ota jasalady. Tize býynyndaǵy baılamalardy qalpyna keltirý jáne endoprotezden keıingi asqynýdy joıý, omyrtqaǵa protez qoıýdyń jańa ádisteri kórsetiledi. Oblysta 70 kereýettik statsıonar bar. Ol jetkilikti»,- dedi oblystyq densaýlyq saqtaý basqarmasynyń basshysy Áset Qalıev.