Travmatıkalyq qarýǵa qatysty ótkennen sabaq alý kerek - Rústem Qaıdarov
ASTANA. QazAqparat - «Generaldar keńesi» RQB tóralqasynyń tóraǵasy Rústem Qaıdarov qoǵamda polıtseılerdi synaý úrdisi men travmatıkalyq qarý alyp júrýge ruqsat berý usynysyna qatysty óz kózqarasyn bildirdi, dep habarlaıdy QazAqparat.
Onyń paıymynsha, polıtsııa óz mindetin atqarady, basqa qyzmet túrleri sekildi bul jumystyń da jetistigi jáne kemshin tustary bar. Іshki ister organdary qyzmetkerleri jumysynyń nátıjeli jetistikteri barshylyq, biraq kez kelgen kemshilikti áleýmettik jelilerde talqylanǵan kezde, bul óz kezeginde polıtsııa qyzmetiniń qylmysty ashý men toıtarýdaǵy búkil jasaǵan jumysyn joqqa shyǵarǵandaı bolady.
Osy oraıda ol búginde polıtsııany syn sadaǵyna iliktirý qazaqstandyq qoǵamda sonshalyqty bir sánge aınalǵandyǵyna toqtala kele, bul turǵyda kóp jaǵdaıda polıtsııaǵa qatysty negizsiz pikirler óris alǵandyǵyna qynjylatynyn jetkizdi.
«Tipti tártip saqshylary óziniń ómirin qaýip-qaterge tigip, syn saǵatta el azamattaryn óz denesimen jaýyp nemese qylmyskermen kúshi teń emes shaıqasta qaza taýyp, erlik jasaǵan bolsa da, ol polıtseıdiń nıetiniń durystyǵyna, tazalyǵyna jáne batyldyǵyna kúmán keltiretinder tabylady. Azamattar esh dálelsiz barlyq polıtsııaǵa, tipti, óziniń mindetin oryndaý ústinde qaıtys bolǵan adamdarǵa da kúıe jaqqany kádimgideı aýyr tıedi. Meniń ne aıtqym keledi? Bárine birdeı baǵa berýge bolmaıdy. Іshki ister organdarynyń basym kópshiligin quraıtyn adal polıtseıler óz mindetterine jaýapsyz qaraıtyn áriptesteri úshin japa shekpeýi tıis», - dep oıyn jetkizdi R. Qaıdarov.
Budan bólek ol travmatıkalyq qarýdy ustaýǵa ruqsat berýge qatysty talaptarǵa qatysty óziniń pikirin bildirdi.
«Myna jaǵdaıdy eskergen jón, ıaǵnı qarýdy erkin ustaý - qylmys deńgeıiniń tómendeýine ákelerine eshqandaı kepildik joq. Kerisinshe, travmatpen qarýlanýdy eń birinshi kezekte qaraqshylyqty, urlyq pen tonaýdy kásip qylǵandar alýy múmkin. Ekinshiden, kez kelgen qarýdy ózin-ózi qorǵaý maqsatyndaǵy qural retinde tek arnaıy daıyndyǵy bar adamdar ǵana qoldana alady. Úshinshiden, travmatıkalyq qarýdyń qatysymen aıtarlyqtaı kóp qylmys jasalǵan ótken jyldardaǵy oqıǵalardan da sabaq alýymyz kerek. Mysaly, 2013 jyly ІІM-de tek qana travmatıkalyq qarý qoldanýǵa qatysty 3,5 myń qylmys tirkelgen», - dedi RQB tóralqasynyń tóraǵasy.
Onyń sózine qaraǵanda, búgingi tańdaǵy QR ІІM júıesinde oń ózgerister barshylyq. Asa aýyr qylmystarǵa qatysty aıtatyn bolsaq, sońǵy 5 jylda qylmys deńgeıiniń tómendeý úrdisi ǵana emes, osy tektes qylmystardyń ashylýy da kóbeıip kele jatqany baıqalady.
«Sondyqtan da ár adam polıtsııany kinálamas buryn, ózinen bastaýy kerek dep esepteımin. Óıtkeni, adamdy mektepte sabaqqa durys qatyspaýǵa eshkim májbúrlemeıdi,sondaı-aq bala tárbıesimen aınalyspaýǵa, jumyssyz otyrýǵa, urlyqty kásip etýge eshkim de bireýdi májbúrlep kóndirmeıdi. Bul jerde azamattardyń ózderine qoıylatyn saýal bar, olar nelikten urlanǵan telefondar men qosalqy bólshekterdi satyp alady? Qazirgi tańda bizdiń azamattardyń jeke tulǵa retinde qalyptasyp ári damýyna jáne jumysqa turýyna barlyq jaǵdaı jasalǵan. Jastar úshin bizdiń respýblıkamyzdyń joǵary oqý oryndarynda granttar kóp bólinedi, jumys izdeýshilerge eńbek bırjasy men tegin kýrstar qarastyrylǵan», - dedi Rústem Qaıdarov.
