Travmatıkalyq qarý atys qarýymen birdeı deńgeıde qaýip tóndiredi - Q. Qasymov
ASTANA. 29 mamyr. QazAqparat - Travmatıkalyq qarý atys qarýymen birdeı deńgeıde qaýip tóndiredi.
Búgin Parlament Májilisinde ótken «Travmatıkalyq qarý:zańnamalyq retteý máseleleri» atty dóńgelek ústel barysynda Іshki ister mınıstri Qalmuhanbet Qasymov osylaı málim etti.
«Jalpy, travmatıkalyq qarýdyń basym bóligin atys qarýdyń tup-týra kóshirmesi dep aıtýǵa bolady. Olardyń aıyrmashylyǵy tek rezeńke oqtarynda ǵana. Degenmen, buǵan qarap osyndaı qarý kisi ólimine soqtyrmaıdy dep aıtýǵa esh kelmeıdi. Bir jaǵynan bundaı qarýdyń múmkindigin kópshilik eskere de bermeıdi. Travmatıka atys qarýyna jatpaıdy dep oılaý da qate. Óıtkeni, travmatıkalyq qarýdy jaqyn qashyqtyqtan qoldaný atys qarýyn qoldanýmen teńdeı», - deıdi Q. Qasymov.
Mınıstrdiń aıtýyna qaraǵanda, álem elderinde ózin-ózi qorǵaýǵa qatysty arnaıy qarýlar qoldanylady. Bulardyń qataryna elektroshoktardy, kózden jas aǵyzatyn gaz-qarýlardy, sondaı-aq alyp júrýge eshqandaı da ruqsat talap etilmeıtin basqa da zattardy jatqyzýǵa bolady.
«Travmatıkalyq qarýy erkin aınalymǵa jatatyn ári 200 jyldan beri ony erkin qoldaný mádenıeti qalyptasqan AQSh-ta sońǵy jyldary kóptegen tótenshe jáne qaıǵyly oqıǵalar oryn aldy, mektep oqýshylaryna deıin qarý qoldaný saldarynan qaza tapty», - dep atap ótti Q. Qasymov.
