TravelStan: jasandy ıntellektige negizdelgen mobıldi qosymsha ázirlenedi

ASTANA. KAZINFORM – Qazaqstanda týrısterge arnalǵan TravelStan mobıldi qosymshasyn ázirleý bastamasy kóterildi.

- Shetel týrısteriniń Qazaqstanǵa kelýi aqparat izdeýden bastalady. Tsıfrlyq dáýirde olar qajetti qyzmetti, ıaǵnı áýe bıletterin, qonaq úıin, týrlardy onlaın satyp alady. Al elge kelgende navıgatsııa úshin túrli karta jáne saıahat servısin qoldanady. Mınıstrlik týrıstiń jol kartasyn zerttep, onyń boıyndaǵy qyzmettiń shashyrańqy ekenin anyqtady. Buǵan qosa, keıbir qyzmet múlde tsıfrlandyrylmaǵan. Mysaly, ulttyq parkter nemese mýzeı-qoryqtarǵa onlaın bılet alý múmkin emes, - dedi Týrızm jáne sport mınıstri Erbol Myrzabosynov Úkimet otyrysynda.

Osy oraıda mınıstr Kazakhstan.travel ulttyq týrıstik portalynda jalpy saıahatshylarǵa arnalǵan qajetti aqparat 8 tilde qoljetimdi ekenin tilge tıek etti.

- Onyń ishinde týrıstik baǵyttar, kórikti jerler, oqıǵalar týraly ózekti málimetterdi usynady. Sonymen qatar vırtýaldy 3D týrlar men týrıstik operatorlardyń tizilimderi jarııalanǵan. 2024 jyly portalǵa shamamen 700 000 adam kirdi. Bul onyń saıahatshylar úshin basty navıgator retindegi mańyzdylyǵyn rastaıdy. Alaıda búginde týrıstke qyzmetterdi brondaýǵa qajetti barlyq servısti biriktiretin biryńǵaı ekojúıe qarastyrylmaǵan. Sondyqtan TravelStan biryńǵaı mobıldik qosymshasyn jasaý týraly bastama kóterildi. Onyń negizgi fýnktsıonaly – jasandy ıntellektige negizdelgen kómekshi, - deıdi ol.

Onyń aıtýynsha, jańa mobıldi qosymsha týrısterge qonaq úıdi brondaý, bıletterdi satyp alý, gıdter men marshrýttardy tabý, taksı shaqyrýǵa kómektesetin jáne basqa da qyzmetterdi bir tsıfrlyq keńistikte biriktiretin qural.

- Atalǵan joba Tsıfrlyq damý mınıstrligimen aldyn ala kelisildi. Endi ony qarjylandyrý máselesin qarastyryp jatyrmyz, - dep tolyqtyrdy vedomstvo basshysy.

Aıta ketsek, byltyr elimizge ártúrli maqsatta 15,3 mln sheteldik qonaq kelgen. 

Sondaı-aq Úkimet otyrysynda elimizde qonaq úı júıesine reforma júrgiziletini aıtyldy. 

Odan bólek, elimizde sharýalarǵa agrotýrızmmen aınalysýǵa ruqsat berilmek.