Trassalyq medpýnkt ınfarkt bolǵan júrgizýshini qutqaryp qaldy
ASTANA. QazAqparat - «Qalqaman» trassalyq medpýnktiniń qyzmetkerleri ınfarkt bolǵan júrgizýshini qutqaryp qaldy, dep habarlaıdy QazAqparat.
QR ІІM TJK «Apattar medıtsınasy ortalyǵy» MM-nyń habarlaýynsha, keshe, 13 qarashada saǵat 16:40-tar shamasynda Pavlodar oblysyndaǵy «Qalqaman» trassalyq medıtsınalyq-qutqarý pýnktine jolda ótip bara jatqan 62 jastaǵy júk kóligin júrgizýshi júreginiń aýyryp turǵanyn aıtyp, kómekke júgingen.
Dárigerler naýqasty qarap shyǵyp, elektrokardıografııalyq zertteý ótkizgen soń naýqasqa jedel koronarlyq sındrom (ınfarkt) degen dıagnoz qoıdy.
Jaqyn mańdaǵy aýdandyq aýrýhanada kardıologııalyq bólimshe bolmaǵandyqtan, naýqasty tez arada atalmysh medpýnkt ornalasqan jerden 100 shaqyrym jerde ornalasqan Pavlodar qalasyndaǵy arnaıy emdeý mekemesine jetkizip jatqyzý týraly sheshim qabyldandy.
Brıgada júrgizýshini reanımobılde emdeý mekemesine jetkize otyryp, sol sátte-aq qajetti emdeý sharasyn kórsetti jáne aǵzalarynyń ómirlik qyzmetin qadaǵalap otyrdy, trassalyq pýnkt dıspetcheri Pavlodar qalasynyń jedel medıtsınalyq kómek kórsetý qyzmetimen habarlasyp, jedel járdem brıgadasynyń aldarynan kútip alýyn surady. 63-shi shaqyrymdy ótkende, naýqas kardıologııalyq brıgadaǵa tapsyrylyp, Pavlodardaǵy 2-shi qalalyq aýrýhananyń arnaıy bólimshesine jatqyzyldy.
Qazirgi tańda naýqas jansaqtaý bóliminde, jaǵdaıy - qalypty, dál qazir ómirine qaýip tónip turǵan joq.
Osylaısha, dár kezinde medıtsınalyq kómek kórsetilgen naýqas qutqaryldy, eger júrgizýshi kólik júrgize berse, jaǵdaıdyń qalaı bolýyn boljaý múmkin emes edi.
Trassalyq pýnkt qyzmetiniń biri - jol-kólik apaty bolǵan jaǵdaılarda shuǵyl kómek kórsetý jáne odan basqa jolda ózdiginen kelip qaralatyn jolaýshylarǵa medıtsınalyq kómek kórsetý. TMQP ashylǵan sátten bastap ózi júgingen 13 myń adamǵa kómek kórsetti, onyń ishindegi 500 adam emdeý mekemelerine jatqyzyldy.
