Trassada janyp ketken eki áıelge kómektespek bolǵan kýáger vıdeo jarııalady

TALDYQORǴAN. QazAqparat - Almaty-Qorǵas jolynda eki áıeldiń kólikte tirideı órtenip ketkeni týraly oqıǵanyń vıdeosy jarııalandy, dep habarlaıdy QazAqparat tilshisi.

Kóliktiń janǵan sáti kómek kórsetý úshin toqtaǵan mashınanyń vıdeotirkegishine jazylǵan. Vıdeodan jol jıeginde turǵan avtokóliktiń aldymen tútindep, keıin qyzyl jalynǵa oranǵanyn kórýge bolady. Sol sátte er adam kóliktiń aldyńǵy esigin ashyp shyǵady. Artqy esik ashylǵanymen, basqa eshkim shyǵyp úlgermeıdi, kólik órtke oranady.

Ózge kóliktiń júrgizýshisi mashınasyn birden toqtatyp, órt sóndiretin qurylǵysyn ala júgiredi. Alaıda, jalyndy óshirý múmkin bolmaıdy.

«Eki áıel adam tirideı janyp ketti. Men kómektesýge barynsha tyrystym. Biraq órtti óshirý múmkin bolmady», - dep jazǵan vıdeo avtory.

Esterińizge sala keteıik, 3 maýsym kúni «Almaty-Qorǵas» avtojolynyń 82-shaqyrymynda jeńil avtokólik órtendi. Kólik salonynda eki áıel tirideı janyp ketti. Oqıǵa ornynan vıdeo túsirgen kýágerlerdiń sózinshe, kólik qyzyl jalynǵa oranǵanda olar ishinde uıyqtap jatqan.

Al qutqarýshylar der kezinde oqıǵa ornyna jete almaǵan. Sebebi, jaqyn mańda órt sóndirý qyzmeti bolmaǵan. Órttiń shyǵý sebebi anyqtalýda.

«Shaqyrý ornyna Almaty oblysy TJD 4 qyzmetkeri men 1 tehnıkasy shyqty. Janǵan jerden órt sóndirý bólimine deıin qashyqtyq 45 km qurady. Órt ornynda avtokólik salonynda 2 jolaýshynyń janyp ketken denesi tabyldy»- dedi Almaty oblystyq TJD baspasóz qyzmetiniń resmı ókili Azamat Jurtbaev.