Trassada tońa bastaǵan: Pavlodar polıtseıleri 56 ózbekstandyqty qutqardy
PAVLODAR. QazAqparat – «Pavlodar – Nur-Sultan» avtojolynda Reseıden Ózbekstanǵa bet alǵan jolaýshylar avtobýsy synyp qaldy, dep habarlaıdy QazAqparat.
«Pavlodar – Nur-Sultan» trassasyn patrýldeý barysynda patrýldik polıtsııa rotasynyń qyzmetkerleri – kapıtan Tilegen Syzdyqov pen aǵa leıtenant Aspandııar Turlybaev jol jıeginde turǵan avtobýsty baıqaǵan. Anyqtalǵandaı, avtobýstyń artqy dóńgeleginiń kúpshegi synyp qalǵan. Salonda 56 adam bolǵan, onyń bireýi – bala, ekeýi – avtobýs júrgizýshisi. Jolaýshylardyń barlyǵy – Ózbekstan Respýblıkasynyń azamattary», - dep málim etti Pavlodar oblystyq Polıtsııa departamentiniń baspasóz qyzmetinen.
Baǵdarlyq avtobýs Reseıdiń Tomsk qalasynan Ózbekstanǵa bara jatqan. Aqaý saldarynan jolaýshylar kóligi birneshe saǵat boıy trassada turǵan. Adamdar sýyq salonda tońa bastaǵan.
«Polıtseıler barlyq adamdy jylyný úshin jaqyn mańdaǵy kempıngke jetkizdi. Qazir kólikti jóndeýge qolǵabys etýde. Aıta ketsek, atalǵan polıtsııa qyzmetkerleri buǵan deıin Reseıden Qyrǵyzstanǵa bet alǵan 53 jolaýshyǵa, taǵy bir joly Tájikstan Respýblıkasynyń azamattaryna kómektesken bolatyn», - dedi vedomstvodan.
