Trassada adam qaǵyp ketken júrgizýshi Almaty oblysynda qolǵa tústi
TALDYQORǴAN. QazAqparat - Almaty oblysynyń polıtseıleri kisi ólimimen aıaqtalǵan jol-kólik oqıǵasy bolǵan jerden qashyp ketken júrgizýshini qolǵa túsirdi, dep habarlaıdy QazAqparat.
Óńirdiń Іshki ister departamentinen habarlanǵanyndaı, qaıǵyly oqıǵa Qapshaǵaı qalasynyń mańynda bolǵan jáne ol jaıaý júrginshiniń ólimimen aıaqtalǵan.
Aıta keteıik, 23 mamyr kúni Qapshaǵaı qalasy mańyndaǵy «Almaty-Óskemen» trassasynyń boıynda, Almaty qalasynyń 53 jastaǵy turǵynynyń máıiti tabyldy. Marqumnyń denesindegi jaraqattary onyń jol-kólik oqıǵasynan qaza bolǵanyn kórsetken. Osy fakti baılanysty qylmystyq is qozǵaǵan tártip saqshylary oqıǵa ornynan ketip qalǵan kólikti anyqtaý boıynsha jedel-izdestirý sharalaryn uıymdastyrdy.
«Jol-kólik oqıǵasy bolǵan jerde ázer kórinetin izder qalǵan. Olar jaıaý júrginshini jol talǵamaıtyn kóliktiń qaqqanynan belgi berip tur. Úsh táýlikten soń kúdik keltirilgen Eńbekshiqazaq aýdanynyń 34 jastaǵy turǵyny qolǵa túsip, polıtsııaǵa jetkizildi»,- dep habarlady Almaty oblystyq Іshki ister departamentiniń Jergilikti polıtsııa qyzmetiniń izdestirý bóliminiń bastyǵy, polıtsııa podpolkovnıgi Erlan Káribaev.
QR QK-niń 345-baby, 3-bóligi boıynsha qarastyrylǵan sotqa deıingi tergeý sharalaryn oblystyq anyqtaý basqarmasynyń qyzmetkerleri jalǵastyrýda. Tıisti saraptamalar taǵaıyndalǵan.
Ustalǵan azamatqa tıesili Toyota Highlander markili kóligi arnaıy turaqqa qoıyldy.
