TRASEKA júkti biryńǵaı tarıfpen tasymaldaýǵa múmkindik beredi – Álıhan Smaıylov
«Bizdiń aldymyzda turǵan aýqymdy mindettiń biri – 2025-shi jylǵa qaraı tranzıttik-tasymal kólemin 30 mln tonnaǵa deıin jetkizý. Elimizdi qýatty tranzıttik habqa aınaldyrýdyń múmkindigi óte zor. Pandemııaǵa jáne syrtqy saıası jaǵdaılardyń áserine qaramastan, tranzıttik-tasymal kólemi ósip keledi. Bıyl eki aıdyń ózinde temirjol arqyly júk tasymalynyń kólemi 10%-ke, al tranzıttik júkterdiń jalpy kólemi 20%-ke ósti.
Qytaı men Eýropa arasyndaǵy konteınerlik tranzıt kólemi de jyl saıyn artyp keledi. 2021-shi jyly bul kórsetkish 732 myń temirjol konteınerine deıin ulǵaıdy», - degen Úkimet basshysy Qazaqstandy qýatty logıstıkalyq habqa aınaldyrý úshinm temirjol ınfraqurylymyn odan ári damytý kerek ekenin eske saldy.
«Geosaıası jáne ekonomıkalyq jaǵdaı ýshyǵyp turǵan qazirgi kezeńde Eýropaǵa baǵyttalǵan tranzıt kólemi men júk tasymalyn azaıtyp almaý úshin tez arada balama marshrýttar ashý isi qolǵa alyndy.
Qazirgi kezde júkterdi Ázerbaıjan men Grýzııa arqyly ótetin Transkaspıı halyqaralyq transshekaralyq baǵyty men TRASEKA arqyly jiberý boıynsha jumystar júrip jatyr. Birlesken kásiporyndar qurý týraly kelisimderge qol jetkizildi. Bul otandyq júk tasymaldaýshylar úshin biryńǵaı tarıfterdi belgileýge múmkindik beredi.
Indýstrııa mınıstrligine «Qazaqstan temir joly» ulttyq kompanııasymen birge Transkaspıı halyqaralyq transshekaralyq baǵytynyń turaqty jumysyn jáne qazaqstandyq bıznes-qaýymdastyq úshin básekege qabiletti, biryńǵaı tarıftiń qabyldanýyn qamtamasyz etýdi tapsyramyn», - dedi Álıhan Smaıylov.
