Tranzıttik poıyzdardan júk urlaýdyń 15 faktisi tirkeldi

ASTANA. KAZINFORM – Ótken jyly tranzıttik poıyzdardan júk urlaýdyń 15 faktisi tirkeldi. Bul týraly Іshki ister mınıstrliginiń Kóliktegi polıtsııa departamentinen málim etti.

- 2025 jyly Kóliktegi polıtsııa departamentiniń qyzmet kórsetý aýmaǵynda «QHR – Eýropa» baǵyty boıynsha tranzıttik poıyzdarmen tasymaldanǵan júkterdi urlaýdyń 15 faktisi tirkeldi. Tasymaldanatyn júkterdiń saqtalýyn qamtamasyz etý máselesi Kóliktegi PD basshylyǵynyń turaqty baqylaýynda. Sondaı-aq, Kóliktegi PD «Qazaqstan temir joly» UK» AQ jáne «Áskerılendirilgen temir jol kúzeti»» JShS-men birlesip, júk urlyǵynyń aldyn alý boıynsha keshendi jedel aldyn alý is-sharalaryn qabyldap jatyr, - dep atap ótti departamentten agenttik saýalyna oraı.

Sonymen qatar vedomstvo málimetinshe, ushaqtar men poıyzdarda qoǵamdyq tártip pen qaýipsizdik talaptaryna qatysty ákimshilik quqyq buzýshylyqtar jıi tirkeledi. Naqtyraq aıtqanda, jolaýshylar alkogoldik ishimdik ishedi nemese masań kúıde júredi. Munan bólek tyıym salynǵan oryndarda temeki buıymdaryn, onyń ishinde qyzdyrylatyn temekisi bar buıymdardy, qorqorǵa arnalǵan temekini, qorqor qospasyn shegedi.

- 2025 jyly Kóliktegi PD qyzmetkerleri esirtkige baılanysty 367 quqyq buzýshylyq anyqtady. Onyń 54-i - satý, 19-y - asa iri kólemde saqtaý, 2-eýi - qylmystyq top qurý, sondaı-aq 14-i - kontrabanda faktisi. Zańsyz aınalymnan jalpy salmaǵy 794 keliden astam esirtki zattary tárkilendi. Sonymen qatar, áýejaılar men temirjol vokzaldarynda júrgizilgen tekserý is-sharalary barysynda sýyq qarýdy alyp júrýge qatysty 402 faktiniń joly kesildi. Ushaqtar men poıyzdarda esirtki zattary men qarý tasymaldaý derekteri tirkelgen joq, - dedi vedomstvodan.

Aıta ketsek, jýyrda Eýrazııalyq ekonomıkalyq odaqqa múshe elderdiń aýmaǵy arqyly ótetin júk tasymaldary jańa tásilmen baqylaýǵa alyndy. Endi eki nemese odan da kóp el arqyly ótetin taýarlar arnaıy navıgatsııalyq plombalar arqyly qadaǵalanady. «Nur Joly» keden beketiniń basshysy Murat Erdenbekovtiń aıtýynsha, bul plombalar júk kólikteri men vagondarǵa ornatylady jáne olardyń qozǵalysyn jol boıy onlaın rejımde baqylaýǵa múmkindik beredi. Júıe aldymen avtomobıl jáne temirjol kóligimen tasymaldanatyn taýarlarǵa engiziledi.