Tranzıttik dálizderde jol jabynyn durys tańdaý kerek — Saýranbaev
ASTANA. KAZINFORM — 2029 jylǵa deıin 5 myń shaqyrym jol jóndeledi. Bul týraly Úkimet otyrysynda Kólik mınıstri Nurlan Saýranbaev aıtty.
— Qazirgi ýaqytta asfalt-beton jabyny 8 tonnaǵa deıingi ostik júktemege eseptelgen. Qarqyndy qozǵalys pen ystyq kezde asfalt shydamaıdy. Osyǵan baılanysty jazǵy merzimniń kúndizgi ýaqytynda júk kólikteriniń qozǵalysyna shekteý qoıylady. Bul tranzıttiń damýyna kedergi keltiredi. Al tsement-beton jabyny aýyr júktemege tózimdi. Qyzmet etý merzimi 40 jylǵa deıin jetedi. Osyndaı jaǵdaıda tranzıttik dálizderde jol jabynyn durys tańdaý mańyzdy, — dedi mınıstr.
Sonymen qatar ol Memleket basshysynyń tapsyrmasyna sáıkes, 2029 jylǵa deıin 10 myń shaqyrym jolǵa ortasha jóndeý júrgiziletinin aıtty.
— Qazirgi tańda onyń 5 myń shaqyrymy jóndelip bitti. 2029 jylǵa deıin taǵy 5 myń shaqyrym jol jóndeledi. Osylaısha qoıylǵan mindet tolyq oryndalady, — dedi Nurlan Saýranbaev.
Aıta keteıik, Úkimet aldaǵy 3 jylda 32 myń shaqyrym óńir joldarynyń normatıvtik deńgeıin 95 paıyzǵa deıin kóterýdi josparlap otyr.
