Endi tranzıttik aýyr júk kólikteri Astanaǵa kire almaıdy
ASTANA. KAZINFORM — Astana qalasynyń aýmaǵy arqyly tranzıttik avtomobıl kóliginiń júrý shemasy men tártibi aıqyndaldy.
Atap aıtqanda, «Qazaqstan Respýblıkasy astanasynyń mártebesi týraly» QR Konstıtýtsııalyq zańy 8-babynyń 13) tarmaqshasyna sáıkes Astana qalasynyń ákimdigi tıisti qaýly shyǵardy.
— Aýyr júk tasıtyn tranzıttik kólik quraldarynyń júrýi «Astana qalasynyń aınalma joly» avtomobıl joly arqyly júzege asyrylady. Aýyr júk tasıtyn tranzıttik kólik quraldaryna «Astana qalasynyń aınalma joly» avtomobıl jolynyń ishinde ornalasqan aýmaǵyna kirýine tyıym salynady, — dep atalyp ótken qujatta.
Jalpy, Qazaqstan Respýblıkasynyń zańnamasynda qala sheginde jeńil avtomobılderdiń qozǵalysyna shekteýler belgilenbegen.
Budan buryn habarlanǵandaı, jazǵy maýsymda respýblıkalyq mańyzy bar avtomobıl joldarynda kólik qozǵalysy kúsheıgenine baılanysty Kólik mınıstrligi júrgizýshilerdi jol qozǵalysy qaǵıdalaryn qatań saqtaýǵa shaqyrdy.
