Tranzıt jýrnalyna rebrendıng jasaldy
ASTANA. QazAqparat - Astanada Qazaqstandaǵy kólik jáne logıstıka salasy týraly jazatyn «Tranzıt.kz» jýrnalynyń tanystyrylymy ótti, dep habarlaıdy QazAqparat tilshisi.
Atap aıtqanda, on jyldan astam tarıhy bar "Tranzıt" jýrnalyna rebrendıng jasaldy. Tanystyrylymǵa kelgen QR Investıtsııalar jáne damý mınıstri Jeńis Qasymbek jýrnaldyń mınıstrlik úshin asa mańyzdy ekenin atap ótti.
"Jýrnaldyń jaryq kórýi biz úshin óte mańyzdy jáne oǵan tehnıkalyq-aqparattyq qoldaý kórsetýge daıynbyz. Qazirgi ýaqytta bizdiń salada aýqymdy ózgerister bolyp jatyr, kólik, tasymal salasy ózgerdi. Qytaıdyń Qazaqstan arqyly ótetin tranzıt kólemi eki esege ulǵaıdy. Ekonomıkamyzdy ártaraptandyrý úshin kólik salasyn damytý qajet. Atqarylyp jatqan barlyq jumysty BAQ-ta tıimdi jarııalaý kerek. Sondyqtan jańa ujymǵa tabys tileımin jáne óz tarapymnan barynsha kómek kórsetýge ázirmin", - dedi mınıstr.
"Men úshin Tranzıt - úlken medıajoba ǵana emes, úlken syn-tegeýrin. Sebebi, kólik salasy - Qazaqstandaǵy eń iri jáne basym baǵyttardyń biri. Geografııalyq turǵyda Qytaı men Reseıdi temir jol, avtomobıl joldarymen jalǵap otyrmyz, Kaspıı teńizinde iri kompanııalar jumys isteýde. Bizdiń ulttyq áýe tasymaldaýshymyz Ortalyq Azııanyń kóshbasshysy atandy. Munyń barlyǵy Qazaqstannyń Eýrazııadaǵy ortalyq hab ekendigin kórsetedi. Bul turǵyda bizdiń komanda Qazaqstannyń kólik-logıstıkalyq hab retindegi ımıdjin jaqsartýǵa, týrıster men ınvestorlardy tartýǵa kómekteskisi keledi", - dedi "Tranzıt" jýrnalynyń bas redaktory Erjan Seıitqazınov basylymnyń resmı tanystyrylymynda.
Jýrnal aı saıyn 5 myń dana tırajben shyǵarylady jáne Qazaqstannyń áýejaılary men temir jol vokzaldarynda, ulttyq kompanııalarda tegin taratylady.
