Tranzıt kólemin 55 mln tonnaǵa deıin ulǵaıtý: mınıstr naqty tapsyrmalar berdi
ASTANA. KAZINFORM — Kólik mınıstri elimizdiń tranzıttik-kólik áleýetin damytý máseleleri boıynsha keńes ótkizdi.
Kólik mınıstri Nurlan Saýranbaev mınıstrliktiń basshylyq quramymen elimizdiń tranzıttik-kólik áleýetin damytý jónindegi Memleket basshysynyń tapsyrmalaryn iske asyrý boıynsha 2026 jylǵy 13 sáýirde ótken keńeste QR Premer-mınıstri Oljas Bektenov bergen tapsyrmalardy oryndaý máseleleri boıynsha jedel vedomstvolyq keńes ótkizdi.
Keńes barysynda kólik salasynyń tıimdiligin arttyrý, ınfraqurylymdyq jobalardy iske asyrýdy jedeldetý, protsesterdi tsıfrlandyrý, sondaı-aq Prezıdent pen Úkimet tapsyrmalarynyń múltiksiz oryndalýyn qamtamasyz etý jónindegi basym mindetter qaraldy.
Oryndaý merzimderin saqtaý men jumystyń sapasyna, sondaı-aq naqty nátıjelerge qol jetkizý úshin basshylardyń jeke jaýapkershiligin kúsheıtýge erekshe nazar aýdaryldy. Mınıstr tranzıt kólemin 55 mln tonnaǵa deıin ulǵaıtý jónindegi nysanaly kórsetkishterge qol jetkizý úshin jedel ári úılestirilgen sharalar qabyldaýdyń mańyzdylyǵyn atap ótti.
Qoıylǵan mindetterge sáıkes negizgi tranzıttik dálizderdi damytý, kólik ınfraqurylymyn jańǵyrtý jáne Qazaqstannyń Eýrazııadaǵy jetekshi tranzıttik hab retindegi rólin nyǵaıtý úshin strategııalyq mańyzy bar jobalardy súıemeldeý jumystaryn jandandyrý tapsyryldy.
Temirjol jobalaryn iske asyrýǵa, avtomobıl ótkizý beketterin jańǵyrtýdy jedeldetýge, teńiz ınfraqurylymyn damytýǵa jáne halyqaralyq tasymaldarda tsıfrlyq sheshimderdi ilgeriletýge erekshe basymdyq berildi.
Keńes qorytyndysy boıynsha mınıstr bekitilgen is-qımyl josparynyń múltiksiz oryndalýyn qamtamasyz etýdi, negizgi baǵyttar boıynsha kúndelikti baqylaý ornatýdy jáne merzimderdiń buzylýyna jol bermeý úshin qosymsha sharalar qabyldaýdy tapsyrdy.
— Memleket basshysy men Úkimet aldyndaǵy jaýapkershilik aıryqsha joǵary. Negizgi mindet — árbir jobanyń sapaly, ýaqtyly ári nátıjeli iske asyrylýyn qamtamasyz etý. Barlyq baǵyt boıynsha resýrstardy barynsha jumyldyrý jáne qatań atqarýshylyq tártip qajet, — dep atap ótti mınıstr.
Eske salsaq, keshe Premer-mınıstr Oljas Bektenov Memleket basshysynyń elimizdiń kólik-tranzıttik áleýetin damytý baǵytyndaǵy tapsyrmalaryn oryndaý jóninde keńes ótkizdi. Premer-mınıstr ótkizý pýnktterindegi jańǵyrtý jumystarynyń baıaý júrgizilip jatqanyn synǵa alyp, qarqynnyń joqtyǵyn alǵa tartty.
