Tranzıt aǵyny artady: Altynkól – Qorǵas toraby kúsheıtiledi
ASTANA. KAZINFORM — Altynkól – Jetigen ýchaskesinde jalpy uzyndyǵy 32 shaqyrymdy quraıtyn eki aralyqta ekinshi joldardyń qurylysy jalǵasyp, sondaı-aq 5 jańa jáne 8 qoldanystaǵy aıyryqty damytý jumystary júrgizilip jatyr. Bul týraly Kólik mınıstrligi málim etti.
Memleket basshysynyń elimizdiń kólik-tranzıttik áleýetin damytý jónindegi tapsyrmalaryn oryndaý sheńberinde negizgi ınfraqurylymdyq toraptardy júıeli jańǵyrtý jumystary jalǵasyp jatyr.
Altynkól stantsııasy men Qorǵas shekaralyq ótkeli biryńǵaı temirjol-shegaralyq keshendi quraıdy jáne halyqaralyq kólik dáliziniń mańyzdy býyny. Atalǵan torap eldiń tranzıttik áleýetin arttyrýda erekshe ról atqarady. Altynkól – Qorǵas toraby arqyly eksport-ımport jáne tranzıttik júk tasymalynyń edáýir kólemi júzege asyrylady.
Infraqurylym júkterdi jedel óńdeýdi, konteınerlerdi qaıta tıeýdi jáne eki memlekettiń temirjol qyzmetteriniń úılesimdi jumysyn qamtamasyz etedi. Qazirgi ýaqytta aýqymdy jańǵyrtý baǵdarlamasy iske asyrylyp jatyr. Altynkól – Jetigen ýchaskesinde jalpy uzyndyǵy 32 shaqyrymdy quraıtyn eki aralyqta ekinshi joldardyń qurylysy jalǵasyp, sondaı-aq 5 jańa jáne 8 qoldanystaǵy aıyryqty damytý jumystary júrgizilip jatyr. Bul jeliniń ótkizý qabiletin táýligine 18 jup poıyzdan 33 jup poıyzǵa deıin arttyrýǵa múmkindik beredi.
Qazaqstan Respýblıkasy Kólik mınıstrliginiń Temirjol jáne sý kóligi komıtetiniń tóraǵasy Nurjan Amangeldınuly Kelbuǵanov jumys sapary aıasynda stantsııadaǵy jobalardyń iske asyrylý barysymen tanysty. Jobalardy aıaqtaý 2026 jylǵa josparlanǵan. Olardy iske asyrý Qazaqstannyń Eýropa men Azııa arasyndaǵy tranzıttik kópir retindegi strategııalyq rólin kúsheıtip, ulttyq kólik-logıstıka júıesiniń tıimdiligin arttyrady.