Tranzıt: temirjol arqyly tasymal 100 mln tonnaǵa jetkizilmek
ASTANA. KAZINFORM – Qytaıdyń Eýropaǵa qurlyq arqyly tasymaldanatyn 80 paıyz temirjol júgi Qazaqstan arqyly ótedi. Bul týraly Úkimet otyrysynda QR Kólik mınıstri Nurlan Saýranbaev málim etti.
- Qazaqstan barlyq negizgi baǵyt boıynsha halyqaralyq kólik dálizder jelisin qalyptastyryp keledi. Elimiz - Qytaı, Ortalyq Azııa, Reseı, Eýropa, Parsy elderi jáne Ońtústik Azııa memleketteri arasynda mańyzdy baılanystyrýshy kópir. Búginde Qytaıdyń Eýropaǵa qurlyq arqyly tasymaldanatyn 80 paıyz júgi Qazaqstan arqyly ótedi, - dedi N. Saýranbaev.
Sonymen qatar, elimizde jáne shetelde termınaldardy damytý jumystary qarqyndy júrip jatyr. Sonyń nátıjesinde Qazaqstannyń biryńǵaı logıstıkalyq ekojúıesi qalyptasyp keledi. Bul júıe, Shyǵys – Batys jáne Soltústik – Ońtústik baǵyttaryndaǵy negizgi kólik-logıstıkalyq toraptardy qamtıdy. Qazirgi kezde marshrýt boıynda jeti termınal bar. Qosymsha taǵy da jeti termınal salynbaq.
- Tranzıt – temirjol salasynyń basty draıveri. Sońǵy bes jylda tranzıt kólemi 20 mln tonnadan 33 mln tonnaǵa deıin ósti. Aldaǵy jyldary bul kórsetkishti eki esege arttyryp, 2030 jyly tranzıt kólemin 67 mıllıon tonnaǵa, al 2040 jyly 100 mıllıon tonnaǵa jetkizý josparda bar. Qazirgi kezde temirjol salasyn tsıfrlandyrý baǵytynda aýqymdy jumys júrip jatyr, - dedi mınıstr.
Onyń aıtýynsha, aldaǵy úsh jyl ishinde 1 myń 391 shaqyrym jańa temirjol salý, myń shaqyrym joldy jańǵyrtý, jyljymaly quramdy jańartý, termınaldyq jelini keńeıtý jáne tsıfrlyq servısterdi damytý kózdelip otyr.
Buǵan deıin habarlanǵandaı, 2030 jylǵa deıin jolaýshylar vagondary 90 paıyzǵa deıin jańarady.
