Transulttyq uıymdasqan top qurdy dep aıyptalǵan SQO-nyń 4 turǵynyn sot aqtap shyqty
PETROPAVL. QazAqparat – Soltústik Qazaqstan oblystyq sotynyń qylmystyq ister jónindegi apellıatsııalyq sot alqasy jeńil kólikter kontrabandasymen aınalysyp, transulttyq uıymdasqan top qurdy dep aıyptalǵan tórteýdi aqtap shyqty, dep habarlaıdy QazAqparat tilshisi.
Petropavlda 4 er adam Qazaqstanǵa Reseı arqyly Japonııadan qymbat avtokólikterdi qosalqy bólshek retinde zańsyz tasymaldady dep aıyptalǵan edi. Biraq, kúdiktilerdiń kinási tolyq dáleldenbeı, olar bıyl aqpan aıynda sot zalynan bosap shyqty.
SQO sotynyń málimetinshe, oblystyq sottyń qylmystyq ister jónindegi apellıatsııalyq sot alqasy qylmystyq isti qaıta qarady.
Prokýror aıyptaýdy talap etip, I., T., D., K.-ny sotqa berilgen qylmystar boıynsha kináli dep tanýǵa jáne bar múlkin tárkilep, bas bostandyǵynan aıyrý jazasyn taǵaıyndaýǵa ótinish bildirdi.
Sot alqasy sottyń úkimin ózgerissiz qaldyrdy. Sonymen qatar, alqa kólik quraldarynyń basym kópshiligi qosalqy bólshek túrinde «Megatron» JShS-ne salyqtan jaltarý maqsatynda kedendik quny tómendetilip ákelingenin anyqtady.
Bul týraly SQO boıynsha Ekonomıkalyq tergeý departamenti jeke qaýlymen habarlandy.
QR QK 385-babynyń 2-bóligi boıynsha I. jáne K.-ny, QR QK 385-babynyń 3-bóligi boıynsha T.-ny, QR QK 287-babynyń 3-bóligi boıynsha D.-ny kináli dep taný týraly sot sheshimi ózgerissiz qaldy.
I., K. jáne D. jasaǵan qylmystar aýyrlyǵy ortasha sanatqa jatatynyn, al D. qylmystyq teris qylyq jasaǵanyn, olardyń alǵash ret sottalǵandyǵyn, jas balalarynyń bolýyn, oń sıpattamalaryn eskere otyryp, sot olarǵa bas bostandyǵynan aıyrýǵa baılanysty emes jaza taǵaıyndady. Osylaısha, kúdiktilerge bas bostandyǵyn shekteý jáne qoǵamdyq jumystarǵa tartý jazasy taǵaıyndaldy.
«Qazaqstan Respýblıkasy Táýelsizdiginiń 30 jyldyǵyna baılanysty raqymshylyq jasaý týraly» QR Zańynyń erejeleri negizinde sottalýshylar taǵaıyndalǵan jazadan bosatyldy.
Jeke tulǵalardan alynǵan kólik quraldary boıynsha olardy qaıtarý týraly sheshim qabyldandy.
