Transulttyq esirtki shemasy áshkerelendi: 40 adam ustaldy
ASTANA. KAZINFORM — Іshki ister mınıstrligi shet memleketterdiń quqyq qorǵaý organdarymen birlesip júrgizgen aýqymdy arnaıy operatsııa barysynda adamdardy esirtki bıznesine tartýdyń transulttyq shemasyn joıdy.
Anyqtalǵandaı, uıymdastyrýshylar shetelde otyryp, ınternet-resýrstar arqyly «jalaqysy joǵary jumys» týraly jarnama taratqan.
Zańdy jumystyń atyn jamylyp, azamattardy zańsyz esirtki aınalymyna tartqan. Olar oryndaýshylarǵa arnaıy koll-ortalyqtar arqyly nusqaý berip otyrǵan.
Elimizdiń 11 óńirinde Qazaqstannyń 40 azamaty ustaldy. Esirtki taratýǵa qatysy bar 11 adam qamaldy.
Odan bólek, taǵy 9 adam esirtki tutynǵany úshin jaýapqa tartyldy. Operatsııa barysynda sıntetıkalyq esirtki, kompıýterlik tehnıka, bank kartalary, smartfondar jáne basqa da aıǵaqtar tárkilendi. Bul baǵyttaǵy jumys jalǵasyp jatyr.
Aıta ketelik SQO-da jyl basynan beri esirtkige qatysty 40-qa jýyq derek tirkelgen edi.