«Transtelekom» kompanııasyn jekeshelendirý protsedýrasy sátti aıaqtaldy

NUR-SULTAN. QazAqparat - «Unit Telecom» JShS «Transtelekom» AQ aktsııalarynyń 75% mınýs bir aktsııa paketiniń resmı ıesi boldy, dep habarlaıdy QazAqparat kompanııa saıtyna silteme jasap.

QR Úkimetiniń «Strategııalyq obektini ıelikten shyǵarý týraly» 2021 jylǵy 11 aqpandaǵy No 58 qaýlysyna sáıkes «Transtelekom» AQ 75% aktsııalar mınýs bir aktsııa paketi «Unit Telecom» JShS-ne berildi.

JShS-niń ortaq ıelenýshisi - kompanııanyń qazirgi dırektorlar keńesiniń tóraǵasy Nuráli Álıev.

Buryn habarlanǵandaı, «2014-2016 jyldarǵa arnalǵan jekeshelendirýdiń keshendi josparyn bekitý týraly» QR Úkimetiniń 2014 jylǵy 31 naýryzdaǵy №280 qaýlysyna sáıkes «Transtelekom» AQ jekeshelendiretin jáne básekelestik ortaǵa ıelikten shyǵarylatyn kompanııalar tizimine engizildi.

Osylaısha, 2015 jylǵy mamyrda «QTJ» UK» AQ ótkizgen ashyq eki kezeńdik tender nátıjesinde jáne Úkimettiń 2016 jylǵy 25 aqpandaǵy №107 qaýlysyna sáıkes «Transtelekom» AQ aktsııalarynyń 49% satyldy.

2018 jyldyń mamyrynda «Transtelekom» AQ aktsııalarynyń 26% mınýs bir aktsııa paketi jekeshelendirýdiń ekinshi tolqyny aıasynda ashyq eki kezeńdik tender arqyly satyp alyndy.

Kompanııany jekeshelendirý barysy týraly aqparat BAQ-ta jáne kompanııanyń resmı resýrstarynda jarııalanǵan.

Esterińizge sala keteıik, «Transtelekom» AQ aktsııalaryn jekeshelendirý protsesi Memleket basshysynyń jekemenshikke berý jáne ekonomıkanyń kvazımemlekettik sektoryn qysqartý qajettigi týraly tapsyrmalaryn oryndaý maqsatynda jasalyp jatyr.